´óÏó´«Ã½

Tha StAnza, Fèis Eadar-nàiseanta Bàrdachd na h-Alba, ga cuir air bhog an-diugh ann an Cill Rìmhinn 's leanaidh i ceithir là. Tha am bàrd, Pàdraig MacAoidh, gu bhith an làthair agus gheibh sinn a bheachd air cho sònraichte 's a tha fèis StAnza ann an saoghal litreachais.

Tha taisbeanadh cho mòr 's a chaidh fhaicinn a-riamh de dhealbhan a' pheantair Johannes Vermeer air fosgladh ann an Taigh-tasgaidh Rijksmuseum an Amsterdam. Ged a tha an obair ealain aige luachmhor sa là a th' ann, chan ann mar sin a bha cùisean nuair a bha Vermeer a' cruthachadh na deilbh.

Cluinnidh sinn bhon neach-ealain Albannach Eòghann MacColla mar a chaidh fear de na deilbh aige a thaghadh airson a bhith mar phàirt de thaisbeanadh a' comharrachadh gu bheil 200 bliadhna bho chaidh Comunn Rìoghail Luchd-Ealain Breatannach a stèidheachadh.

Thèid oidhche shònraichte a chumail ann an Glaschu an ath-oidhch', nuair a bhios Ceòlraidh Ghàidhlig Ghlaschu a’ còmharrachadh ceathrad bliadhna bho thòisich Coinneach MacThòmais mar stiùiriche air a' chòisir. Gheibh Maureen facal air dithis no thriùir a th' air a bhith nam buill den chòisir thar nam bliadhnaichean.