´óÏó´«Ã½

Tha Geamannan nan Eilean a' gabhail àite ann an Guernsey an-dràsta. Ach cò ris a tha e coltach a bhith fuireach air an eilean? Tha faisg air leth-cheud bliadhna bho rinn Dolina Moriarty à Taobh a Tuath Bhaghasdail a dachaigh ann agus bha i ann an còmhradh ri Cathy.

Tha an t-sreath, Outlander, a tha stèidhichte air leabhraichean Diana Gabladon air a bhith fìor shoirbheachail bho nochd e air telebhisean bho chionn naoi bliadhna. Tha na nobhailean agus an t-sreath tbh stèidhichte gu mòr air Alba anns an ochdamh linn deug - rud a th' air ùidh mhòr a thogail air feadh an t-saoghail ann an eachdraidh agus cultar na h-Alba. An ath sheachdain, thèid co-labhairt eadar-nàiseanta mu Outlander a chumail aig Oilthigh Ghlaschu. Dh'innis Gillebrìde MacIlleMhaoil, e fhèin na òraidiche aig an oilthigh, dè bhios a' dol ann 's e eòlach air eachdraidh agus òrain nan Seumasach agus mar a thug Outlander dreach ùr air a bheatha fhèin.

Tha seusan na fèilltean oirnn – gach samhradh tha fèilltean àiteachais is coimhearsnachd agus geamannan Gàidhealach a' tarraing sluagh mòr a-steach gu sgìrean air feadh na dùthcha. Ach a bheil sinn a' toirt smuain don obair a tha an luib a leithid a chur ri chèile - bho bheathaichean mart gu farpaisean chloinne, biadh, cur-seachadan, teantaichean tì is leann, pìobairean, dannsairean is a h-uile nì a tha a' cruthachadh aon là sònraichte a tha cho tlachdmhòr dhan h-uile duine sean is òg a tha an làthair? Tha Cathy air a bhith a' còmhradh riuthasan a tha an sàs am-bliadhna.

'S e Uilleam Dòmhnallach, Stiùiriche Foghlam, Sgilean agus Sheirbheisean Chloinne aig Comhairle nan Eilean Siar, a bha air aoigheachd aig Cathy Diciadain. Leig Uilleam, a bhuineas do Thaigh a' Ghearraidh an Uibhist a Tuath, air a bhith an sàs ann am foghlam airson còrr is dà fhichead bliadhna, dheth a dhreuchd Dihaoine.