´óÏó´«Ã½

Aig meadhan-là an dè dh’ainmich Humza Yousaf gu robh e a‘ dol a dh’fhàgail a dhreuchd mar Phrìomh Mhinistear. Tha sin air tòrr cheistean a thogail a thaobh cò a ghabhas àite Mgr Yousaf agus an tèid taghadh a ghairm ann an Alba am-bliadhna. Tha am fear-naidheachd poilitigeach againn, Micheal MacNèil, air a bhith rannsachadh na cùis.

Tha Comann Rìoghail Tuathanachais-gharraidh a’ comharrachadh gur e seo Seachdain Nàiseanta Gàirneilearachd. Le prìs lusan agus measan a' fàs cho daor, tha barrachd dhaoine a’ coimhead airson dòighean air airgead a shàbhaladh 's iad a' cur agus a' fàs an cuid fhèin. Tha triùir còmhla rinn a tha air a bhith gu math trang sa gharradh agus bheir iad dhuinn comhairle air mar a tha iad fhèin a' sàbhaladh na sgillinnean.

Mìnichidh an t-eòlaiche-teicneòlais, Dòmhnall I Dòmhnallach, an lagh ùr sa Rìoghachd Aonaichte a tha a' ciallachadh gu feum companaidh a tha a’ cruthachadh 's a' reic innealan-didseatach, no smart gadgets, leithid fònaichean-laimhe, uaireadairean didseatach, camarathan-dìon agus fiù 's monatair naoidhein, riaghailtean gu math teann a leantainn a thaobh sàbhailteachd air-loidhne.

'S tha Aonghas Pàdraig Caimbeul air a bhith a' rùileach tro thasglann nam pàipearean-naidheachd, a' sireadh sgeulachdan inntinneach agus annasach a nochd annta air an t-seachdain s' ann an eachdraidh.