´óÏó´«Ã½

Bha cabhaig ga dhèanamh aig 10 Sràid Downing an dèidh an taghaidh, gus am Prìomhaire ùr 's a chuid gnothaichean a ghluasad a-steach. Bha Cathy a' bruidhinn ri feadhainn mun othail a tha an cois a bhith a' gluasad dachaigh. Dè na dòighean as fheàrr air a dhol timcheall air?

Tha ball-pàrlamaid ùr aig na h-Eileanan an Iar airson a' chiad uair ann am faisg air fichead bliadhna, esan Torcuil Crichton, às a' Rubha ann an Leòdhas. Fhuair Cathy cothrom còmhraidh leis is e air ùr-thòiseachadh aig Westminster.

B' i Norma Young à Stafainn san Eilean Sgitheanach cèiliche na seachdain. Bha Norma os cionn a' chiad sgoil ann an Roinn na Gàidhealtachd a chaidh ainmeachadh mar sgoil Ghàidhlig, ‘s an uair sin ann an diofar dhreuchdan aig àrd ìre co-cheangailte ri foghlam. Chan ann na tàmh a tha i air a bhith bho leig i seachad a dreuchd a bharrachd; tha i trang a’ ruith làrach campachaidh san Eilean Sgitheanach agus na Leas-mhorair-ionaid a’ Chrùin do sgìre Rois is Chrombaidh.

Cuin a bu chòir dhut a' fòn agad fhàgail balbh gun bìog a' tighinn às na do phòcaid? 'S iomadh turas a chuala sinn fòn a' dol dheth nuair nach bu chòir, ach dè tha modhail is dè tha mì-mhodhail mu na dòighean anns a bheil sinn a' cleachdadh nam fònaichean againn? Bha Domhnall MacGilleMhoire, Coinneach Combe, agus Ruairidh Greumach a' beachdachadh air a' chùis bho shealladh luchd-cuirm, luchd-cèilidh, agus luchd-èisteachd.