´óÏó´«Ã½

Myrddin ap Dafydd yn sgwrsio ar raglen Bore Cothi ac yn darllen cerdd.

"Dwi wedi bod yn gweithio ar gerdd am ganeuon dwi’n eu clywed ar y radio. Yn arbennig y caneuon roedd Richard Rees yn eu chwarae fore ddoe. Caneuon cyfoes o’r oes o’r blaen ydi rhai ohonyn nhw – clasuron gan Endaf Emlyn, Dewi Pws, Ems ac ati. Caneuon newydd gan fandiau newydd ydi gweddill y rhagen – Al Lewis, Alun Tan Lan a Lowri Evans ac ati. Mae’r rhaglen hon yn fwy na’r un yn dangos bod caneuon radio yn gyfeiliant i ddegawdau o’n bywydau ni! Mae’n dangos fod na draddodiad sydd ddim yn darfod, ac yn dal i dyfu."

Felly dyma gerdd am y caneuon hynny.

Cân gyfoes o’r oes o’r blaen ar y radio

Mae’r botwm wedi’i bwyso; ni ddaw’n ôl
Y gân, y galon honno, dyddiau iau –
Ond dal i’w clywed mae’r tonfeddi ffôl.

Y tynnu sylw, yna’r tynnu stôl
A’r alaw’n jeifio rhwng canhwyllau dau:
Mae’r botwm wedi’i bwyso; ni ddaw’n ôl.

Ar ôl yr wˆyl, cariadon roc a rôl
A welodd bandiau’n gadael, giatiau’n cau –
Ond dal i’w clywed mae’r tonfeddi ffôl.

A phwy sy’n dal i gofio’r Hen Down Hôl?
Yr eiliad ddofn, ac amser yn dyfnhau?
Mae’r botwm wedi’i bwyso; ni ddaw’n ôl.

Blynyddoedd doeth sy’n datod edau’r siôl
O nodau, ac mae’i llun a’i lliw’n pellhau;
Ond dal i’w clywed mae’r tonfeddi ffôl.

Rhaid imi ollwng hyn i gyd o ’nghôl,
Mae’r traciau’n pylu ac mae’r tâp mor frau;
Mae’r botwm wedi’i bwyso; ni ddaw’n ôl.
Ond dal i’w clywed mae’r tonfeddi ffôl.

Llai