大象传媒

Sweet closes the evening on Craigieburn-Wood,
And blythely awaukens the morrow;
But the pride o' the spring in the Craigieburn Wood
Can yield me nought but sorrow.

Beyond thee, dearie, beyond thee, dearie,
And O to be lying beyond thee!
O sweetly, soundly, weel may he sleep
That's laid in the bed beyond thee.

I see the spreading leaves and flowers,
I hear the wild birds singing;
But pleasure they hae nane for me
While care my heart is wringing.

I can na tell, I maun na tell,
I daur na for your anger:
But secret love will break my heart,
If I conceal it langer.

I see thee gracefu', straight and tall,
I see thee sweet and bonie;
But Oh, what will my torments be,
If thou refuse thy Johnie!

To see thee in another's arms,
In love to lie and languish:
'Twad be my dead, that will be seen,
My heart wad burst wi' anguish!

But Jeanie, say thou wilt be mine,
Say thou loes nane before me;
And a' my days o' life to come
I'll gratefully adore thee.

Beyond thee, dearie, beyond thee, dearie,
And O to be lying beyond thee!
O sweetly, soundly, weel may he sleep
That's laid in the bed beyond thee.

Show less