Un nos ola leuad - hir iawn
Be sydd o'i le efo paent yn sychu?
A gwair yn tyfu, tasa hi'n mynd i hynny.
Pam maen nhw wedi cael enw mor ddrwg?
Fe fum i'n gweld New Moon y dydd o'r blaen - yr ail ffilm mewn cyfres sy'n galw ei hun yn Twilight Saga.
Tweileit fyddai Ifas y Tryc yn ei ddweud am dÅ· bach ers talwm. Mi allai ddeall pam.
Yno - yn y sinema nid y tweileit, ymhlith llancesi nwyfus yn eu harddegau a oedd yno i edmygu'n serchglwyfus actorion tyn, cnotiog a sgleiniog eu cyhyrau - dyma ffilm sy'n rhoi enw drwg i baent yn sychu.
Ac yn ffilm lle mae'r coed mewn coedwig yn llai prennaidd na rhai o'r actorion.
Nid pawb, fyddai'n cytuno wrth gwrs - gan gynnwys ein hadolygydd ni - ac, yn wir i chi, mae hon yn ffilm mae'r ifanc yn rhuthro'n donnau nwydwyllt o berlewyg i'w gwylio yma ac yn y Merica.
Ond ysu'r oedd eraill ohonom am sŵn tyrchu a chnoi popcorn o'r seddau cyfagos. Inni gael rhywbeth i'n cadw'n effro a'n cyffroi am bris ein tocyn.
Un Nos Ola Leuad doedd hi ddim.
