Naw mis arall Caryl
Pan gyhoeddwyd nofel ddiweddaraf Caryl Lewis tybiodd mwy nag un fod a wnelo'r Naw Mis yn y teitl rywbeth a chael babi.
Allen nhw ddim fod wedi bod ymhellach ohoni gan mai naw mis cwbl wahanol sydd dan sylw yn y nofel arallfydol hon.
Ar y llaw arall, doedden nhw ddim mor bell a hynny allan ohoni ychwaith achos o fewn tridiau i gyhoeddi'r nofel fis Rhagfyr diwethaf roedd Caryl wedi geni Joseff Hedd, ei phlentyn cyntaf hi ac Aled.
"Cael a chael fu hi pa un fyddai gyntaf, lansio'r nofel neu geni Hedd," meddai Garmon Gruffudd o'r Lolfa sy'n cyhoeddi llyfrau Caryl.
Ond tybed allwn ni ddisgwyl yn awr nofel am fabis gan Caryl? Byddai'r amryw o edmygwyr sydd ganddi fel nofelydd wrth eu boddau.
