Fawr o chwerthin
Adolygydd mewn cylchgrawn Saesneg yn cwyno y dydd o'r blaen cyn lleied o lyfrau doniol neu ddigri sydd ar gael yn yr iaith honno ar gyfer y Nadolig hwn.
Llai nag erioed meddai gyda'r nifer wedi bod yn gyson leihau dros y blynyddoedd diwethaf.
Be sydd wedi digwydd i gyhoeddi llyfrau digri? yw ei alarnad.
Hynny'n peri imi gael golwg beth sydd yna i godi gwên ar ein hwynebau ni y darllenwyr Cymraeg y Nadolig hwn.
Dim rhyw lawer mae'n ddrwg gen i ddweud. Cyfeiriais chydig yn ôl at Hiwmor Pregethwr gan Goronwy Evans - casgliad o jôcs o gyffiniau'r capel a'r mans.
O'r un wasg, Y Lolfa, mae "storiâu hiwmor cefn gwlad" Pwy Fage Ddefaid gan y diddanwr Ifan Gruffydd ac mae gan Y Dyn Dwad ei gyfrol ddiweddaraf, Nefar in Ewrop ond nid at bawb y mae o'n apelio.
Yr ydw i'n edrych ymlaen fwy at gael fy nwylo ar Si Bêi straeon ysbyty Wili Bach Saer gan Geraint V Jones - ei gyfrol o straeon digri gyntaf os dalltis i'n iawn.
Am ryw reswm "Helyntion Wili Bach Wael" mae o'n ddweud yng nghatalog Gwledd y Dolig ond saer ydi o ar glawr y llyfr. Rhywun yn trio tynnu'n coes efallai!
A dyna ni, hyd galla i weld - ond os gwyddoch am eraill anfonwch rhag blaen. Mae'n amser dechrau prynu.
Ond yr argraff rydw i'n gael yw y gallem ni fod wedi gwneud efo llyfr Harri Parri go dda.
