"Dwi licio glan môr, dwi 'di bod isho byw ar lan y môr ers dwi'n fach."
Ychydig a feddyliodd Rhian Yoshikawa o Fôn y bydda'r lan môr honno ben arall y byd, yn Japan ac y byddai ei phlant ei hun yn cael eu magu ar lan y môr, ond yn siarad Siapanaeg.
Choshi yn Siapan yw ei chartref bellach lle mae'r haul yn codi gyntaf yn y byd. Gwlad sy'n wrthgyferbyniad o dechnoleg newydd, arloesol a thraddodiadau diwylliant hynafol.
Lle hynod o wahanol i Sir Fôn ond lle y mae Rhian wedi ei wneud yn gartref iddi ers pymtheng mlynedd bellach.
 Ar gyfer Ar Dy Feic ymwelodd Hywel Gwynfryn â Siapan a chael cip ar fywyd Rhian yno.
O Dalwrn ym Môn y daw Rhian Yoshikawa a'i bwriad gwreiddiol oedd treulio dim ond blwyddyn yn y wlad ond fel yr awgryma'i chyfenw, mae hi erbyn hyn wedi priodi brodor o Siapan.
Cyfarfu hi â Toru mewn noson allan ac aeth y flwyddyn o ymweliad yn bymtheng mlynedd, yn briodas, yn ddau o blant ac yn waith a gyrfa yn y wlad.
Choshi bellach yw ei chartref, porthladd pysgota rhyw ddwyawr o Tokyo ac yn enwog am ei ffatrioedd soy sauce a physgod.
Mae'n hapus iawn yn ei gwlad fabwysiedig, gyda'i phlant Cai sy'n naw oed a Menna sy'n saith.
Mae'n dysgu Saesneg i blant ac oedolion yn ogystal â chynorthwyo Toru gyda busnes y teulu, siop gwerthu llestri.
 Cafodd Hywel groeso traddodiadol Siapaneaidd yn eu cartref, gan gamu i mewn i'r ty yn nhraed ei sanau yn ôl yr arfer.
Blasodd de gwyrdd mewn seremoni gyda theulu yng nghyfraith Rhian ac ymwelodd â theml Shinto gyda'r teulu a bu mewn seremoni arbennig y cymerodd Menna ran ynddi ar ei phen-blwydd yn saith oed.
Ac fel y plant eraill roedd wedi ei gwisgo mewn kimono ar gyfer y diwrnod arbennig hwn yn hanes y teulu.
|
