´óÏó´«Ã½

Mae teulu menyw oedrannus fu farw yn ystod y llifogydd yn Llanelwy wedi rhoi teyrnged iddi.

Fe fyddai Margaret Hughes wedi dathlu ei phen-blwydd yn 92 oed ddydd Iau.

Cafodd ei disgrifio fel menyw annibynnol a phenderfynol iawn ac yn llawn hiwmor a hwyl.

Dywedodd ei theulu: "Er gwaetha'i hoedran, roedd yn llawn asbri ac yn mwynhau diddanu eu hwyrion a'u gor-wyrion, yn enwedig dros y Nadolig.

"Roedd yn mynd i gerdded a hel coed tan yr oedd yn ei hwythdegau.

'Byth yn cwyno'

"Roedd yn dod o hen deulu o ffermwyr oedd byth yn cwyno a phob tro dymuniadau eraill oedd yn dod yn gyntaf.

"Treuliodd y rhan fwyaf o'i bywyd cynnar yn ffermio ger Corwen ac yna ym Mhlas Coch Llanelwy cyn symud i Tai'r Felin.

"Mae'r newyddion am ei marwolaeth annisgwyl wedi ein hysgwyd ni.

"Roedd yn dal yn llawn bywyd ac yn edrych ymlaen at y Nadolig."

Dywedodd y teulu eu bod am ddiolch o galon am y negeseuon o gefnogaeth ac ewyllys da ond eu bod bellach yn gofyn am breifatrwydd yn ystod y cyfnod anodd iawn yma.