´óÏó´«Ã½

Mae is-ganghellor Prifysgol Abertawe wedi cael ei wahardd o'i waith tra bod ymchwiliad mewnol yn cael ei gynnal.

Mae'r Athro Richard B Davies wedi bod yn is-ganghellor y brifysgol ers 2003.

Mae deon yr Ysgol Reolaeth, yr Athro Marc Clement, hefyd wedi cael ei wahardd o'i waith.

Dyw Prifysgol Abertawe ddim wedi manylu ar natur yr ymchwiliad.

Mae e-bost at staff, sydd wedi'i weld gan ´óÏó´«Ã½ Cymru, yn datgelu bod dau aelod arall o staff yr ysgol reolaeth wedi'u gwahardd hefyd.

"Gallaf eich sicrhau nad yw'r materion dan sylw yn ymwneud â pherfformiad academaidd y brifysgol na'i lles ariannol," meddai'r e-bost.

Dywedodd y brifysgol mewn datganiad: "Gall Prifysgol Abertawe gadarnhau bod yr is-ganghellor Richard B Davies a'r Athro Marc Clement wedi cael eu gwahardd nes y bydd ymchwiliad mewnol wedi'i gwblhau.

"Ni fyddwn yn gwneud sylw pellach ar hyn o bryd."

Cafodd yr Athro Davies ei fagu yng ngorllewin Cymru. Aeth ymlaen i astudio peirianneg ym Mhrifysgol Caergrawnt cyn astudio am PhD ym Mhrifysgol Bryste.

Mae'r Athro Clement, o Lanelli, wedi bod yn ddeon ysgol reolaeth Prifysgol Abertawe ers 2015.