´óÏó´«Ã½

Mae Prifysgol Aberystwyth wedi datgelu'r cynlluniau diweddaraf i adnewyddu adeilad yr Hen Goleg yn y dref.

Yr amcangyfrif yw y bydd yn costio £26.2m, a daw wrth i ymgynghoriad cyhoeddus gael ei lansio ynglŷn â'r cynlluniau.

Cafodd cynlluniau manwl ar gyfer y prosiect eu datgelu mewn digwyddiad yn yr adeilad nos Fawrth.

Dywedodd y brifysgol y byddai'r cynlluniau yn "dod â bywyd newydd i'r Hen Goleg".

Mae'r cynlluniau'n cynnwys creu amgueddfa fyddai'n adrodd hanes y brifysgol, gofod ar gyfer celf ac arddangosfeydd, canolfan wyddoniaeth, cyfleusterau cynadledda a gofod astudio i fyfyrwyr.

Byddai hen lyfrgell yr adeilad ar gael ar gyfer digwyddiadau fel priodasau, a bydd y lloriau uchaf yn cynnig llety pedair seren 33 ystafell.

Fe fyddai 12 o unedau busnes, caffi-bistro, bar a stiwdios ar gyfer artistiaid hefyd yn rhan o'r datblygiad.

Mewn ychwanegiad at y cynlluniau gwreiddiol i drawsnewid yr Hen Goleg, mae'r penseiri hefyd wedi ymgorffori ym mhrosiect y ddau dÅ· Sioraidd cyfagos sy'n eiddo i'r brifysgol.

Byddai atriwm chwe llawr o uchder yn cael ei greu uwchben a thu ôl i rif 1 a 2 y Rhodfa Newydd.

Yn ôl Prifysgol Aberystwyth, byddai'r adnewyddiad yn "creu hyd at 40 o swyddi newydd a denu dros 200,000 o ymwelwyr bob blwyddyn".

Y bwriad yw agor yr adeilad ar ei newydd wedd ym mlwyddyn academaidd 2022-2023, pan fydd y brifysgol yn dathlu ei phen-blwydd yn 150.

Dywedodd Is-ganghellor Prifysgol Aberystwyth, yr Athro Elizabeth Treasure: "Mae'r Hen Goleg yn un o adeiladau mwyaf adnabyddus Cymru ac yn fan geni Prifysgol Cymru, ond mae angen inni ail-gyflunio ei bwrpas ar gyfer cenhedlaeth newydd.

"Bydd ein cynlluniau ailddatblygu a chodi arian yn arwain at greu cyfleusterau a chyfleoedd newydd i'r brifysgol ac i fyfyrwyr yn ogystal â bod yn brosiect adfywio o bwys i'r gymuned leol, a fydd yn denu ymwelwyr o bell ac agos.

"Trwy roi bywyd newydd i'r Hen Goleg, byddwn hefyd yn diogelu rhan greiddiol o'n treftadaeth ac yn sicrhau dyfodol mwy cynaliadwy i'r adeilad rhestredig Gradd I hwn."

Fe wnaeth Llywodraeth Cymru gyhoeddi'r wythnos ddiwethaf y byddan nhw'n cyfrannu £900,000 tuag at adnewyddu rhan o adeilad yr Hen Goleg.

Daeth hynny wedi i'r brifysgol gyhoeddi'r llynedd y byddan nhw'n derbyn dros £10m o arian loteri er mwyn adnewyddu'r adeilad.

Bydd y cynlluniau'n cael eu harddangos yn yr Hen Goleg o 12 Rhagfyr nes 24 Ionawr 2019, a bydd cais am ganiatâd cynllunio yn cael ei gyflwyno i Gyngor Ceredigion ar ôl hynny.