´óÏó´«Ã½

Mae un o gyfarwyddwyr cwmni Microsoft wedi bod nôl i'w hen filltir sgwâr ar Ynys Môn i ledu'r neges bod rhaid i Gymru gredu yn ei hun yn y maes technoleg - a helpu ei hun i lwyddo.

Daw Daniel Sumner o Lanfachraeth ym Môn yn wreiddiol ond mae bellach yn byw yn Seattle yn yr Unol Daleithiau ac yn gyfarwyddwr byd-eang i Microsoft, yn gyfrifol am arloesedd yn y sector cyhoeddus.

Taniodd ei ddiddordeb yn y byd cyfrifiadurol tra roedd yn Ysgol Uwchradd Bodedern ac wedi 20 mlynedd yn y maes mae wedi ennill aelodaeth o Glwb Platinwm Microsoft, sef cydnabyddiaeth uchaf y cwmni i'w staff.

Mae'n teithio'r byd yn helpu dinasoedd mawr a chymunedau bach i fanteisio ar y dechnoleg sydd ar gael.

Daeth nôl i Gymru i gymryd rhan mewn cynhadledd wedi ei threfnu gan Hwb Menter Môn.

Wrth siarad gyda Gari Wyn ar Radio Cymru dywedodd y byddai wrth ei fodd yn gallu gwneud mwy yn ei hen fro, a helpu gyda datblygu technoleg Gymraeg hefyd.

Does dim rheswm, meddai, pam na all Cymru ddatblygu'r diwydiant yma - mae'r un systemau cyfrifiadurol a rhwydweithio i'w cael yng Nghymru ag unrhyw le arall yn y byd.

"Does na ddim gwahaniaeth efo'r technoleg, felly pam lai nad ydyn ni'n cael mwy o gwmnïau technoleg yng Nghymru? Pam nad ydyn ni'n gallu gwneud mwy? Dwi'n credu ein bod ni yn gallu gwneud mwy," meddai.

"Y peth mwya' pwysig ydy sgiliau, a bod pobl yn coelio eu bod nhw'n gallu gwneud pethau fel hyn.

"Blynyddoedd yn ôl nes i fynd nôl rownd ysgolion yr ardal a nes i siarad am robotics a phethau felly.

"Doedd y plant ddim yn coelio mod i o Ynys Môn. Doedden nhw ddim yn coelio bod hi'n bosib i rywun sy'n mynd i'r ysgol yma allu gweithio i Microsoft.

"Dydi hynny ddim yn iawn - ddylan nhw feddwl bod nhw'n gallu gwneud hynna, os ydyn nhw eisiau.

"Mae pobl yn meddwl 'dim fi', 'does gen i ddim siawns o wneud hynna', 'mae 'na bobl gwell'. Wel, mae 'na bobl sydd â graddau gwell na fi.

"Roedd 'na bobl efo graddau gwell na fi yn yr ysgol, oedd 'na bobl sy'n gallu gwneud mwy, ond I wanted it more - ro'n i isho fo mwy!

"Rhaid inni gredu yn ein hunain mwy a [chredu] bod ein pobl ifanc ni yn gallu gwneud gwaith fel hyn - pam lai?"

Yn fwy na hynny, meddai, mae angen inni gredu ei bod yn bosib ei wneud yma, yng Nghymru.

"'Dach chi'n gweld be sydd wedi digwydd yn India efo technoleg... y gwahaniaeth ydy bod y bobl yn meddwl bod nhw'n gallu wneud o. Maen nhw'n codi yn y bore, maen nhw'n gweithio'n galed iawn i ddysgu technoleg newydd.

"Ond maen nhw'n coelio bod nhw'n gallu neud o - a maen nhw."

Nid y dechnoleg ei hun sy'n bwysig meddai Daniel Sumner - dod at ein gilydd fel cymunedau yw'r gyfrinach.

"Mae gynnon ni [Microsoft] llawer o bethau sy'n gallu helpu, ond dwi eisiau i bobl allu helpu eu hunain a dweud y gwir.

"Mae gynnon ni dechnoleg, mae gennym ni gyfrifiaduron, a software a bob math o bethau y gallwch eu defnyddio ond y peth ydi mae'n rhaid inni gael pobl i ddod mwy at ei gilydd, dros y gymdeithas.

"Pobl technoleg, pobl academaidd, pobl sy'n ffermio, pobl fusnes - mae'n rhaid iddyn nhw ddod at ei gilydd.

"Pan ydan ni'n edrych ar rywle fel Silicon Valley neu rywle fel'na, y mwya' aml mae pobl yn dod at ei gilydd y mwya' aml mae syniadau yn datblygu ac y mwya' aml mae busnes newydd yn cael ei ddatblygu."

Mae gan Gymru gyfle i weithio yn y maes digidol a thechnolegol meddai Daniel Sumner, ac mae'n awyddus i wneud mwy i helpu ei ardal enedigol a helpu unrhyw un sydd eisiau arweiniad ganddo.

"Dwi eisiau gwneud mwy o waith i'r ardal yma, dwi'n gwneud y gwaith dros y byd - fyswn i'n hoffi gwneud ychydig bach mwy efo fy nghartref," meddai.

Mae datblygu mwy o wasanaethau Microsoft drwy gyfrwng y Gymraeg yn brosiect arall sy'n agos at ei galon - mae wedi helpu i greu fersiynau Cymraeg o raglenni fel Office a Word yn barod, ond fe hoffai wneud mwy a chlywed gan siaradwyr Cymraeg.

"Fyswn i'n hoffi gwneud mwy ond 'swn i'n hoffi gwybod beth mae pobl eisiau ar y funud, a beth 'nesa yn Gymraeg.

"Beth mae pobl eisiau wneud ac eisiau ei weld [yn digwydd]? Fyswn i'n hoffi gwybod mwy."

Ei angerdd dros y maes a'i awydd i ddysgu pethau newydd sy'n gyfrifol am ei lwyddiant meddai Mr Sumner ac mae'n dal i gadw mewn cof y neges ysgrifennodd athrawes yn yr ysgol iddo mewn cerdyn - 'gwna dy orau'.

Ond mae'n cyfaddef, er ei lwyddiant a'i swydd uchel yn un o gwmnïau technoleg mwya'r byd, ei fod yn dal yn cwestiynu ei lwyddiant weithiau.

"Dwi'n syffro o imposter syndrome - dwi'n meddwl fydd y bois o Llanfaethlu yn dod i Seattle ac yn dweud 'reit, mae'n amser mynd adref rŵan'!"

Hefyd o ddiddordeb: