´óÏó´«Ã½

Mae cynlluniau i ailddatblygu cartref cwmni theatr gynhyrchu mwyaf Cymru wedi cael eu datgelu i'r cyhoedd.

Mae'r gwelliannau posib i Theatr Clwyd, a gafodd ei sefydlu yn Yr Wyddgrug yn 1976, yn cynnwys ailwampio mannau cyhoeddus, theatr 'pop-up' newydd drws nesaf gyda 300 o seddi a chyfleusterau arbennig i wella iechyd a lles ymwelwyr.

Mae'n fwriad hefyd i sicrhau bod yr adeilad yn fwy cynaliadwy ac yn gwneud defnydd mwy effeithlon o ynni.

Bydd ymgynghoriad cyhoeddus yn para tan 23 Medi, ac mae disgwyl i gymal cyntaf y gwaith ailwampio ddechrau yn 2021.

Bydd y theatr yn aros ar agor tra bo'r gwaith adeiladu yn mynd ymlaen.

Mae'r gwaith hwnnw yn cynnwys caffi ar gyfer pobl sy'n byw gyda dementia, gardd synhwyraidd a maes chwarae.

Bydd hefyd yn creu ystafelloedd ymarfer sy'n gweddu maint theatrau'r adeilad presennol, a bydd llwyfan Theatr Anthony Hopkins yn cael ei hatgyfnerthu.

Dywedodd Cyfarwyddwr Gweithredol Theatr Clwyd, Liam Evans Ford: "Rydym wrth ein boddau wrth symud ymlaen i gam nesaf y project unwaith mewn oes yma i ddiogelu dyfodol Theatr Clwyd a'i effaith economaidd i ogledd ddwyrain Cymru, sy'n werth dros £7.7m bob blwyddyn.

"Bydd y project hefyd yn sicrhau bod gogledd Cymru'n parhau i allforio theatr o'r radd flaenaf yn fyd-eang ac adeiladu ar yr 500,000 o bobl sydd wedi gweld cynhyrchiad Theatr Clwyd yng ngweddill y DU dros y ddwy flynedd ddiwethaf."

Yn ôl Prif Weithredwr Cyngor Sir y Fflint, Colin Everett, mae'r cynllun ailddatblygu'n "hanfodol" i sicrhau bod yr adeilad yn cwrdd â'r safonau diweddaraf "ac i wella'r profiad i ymwelwyr".