´óÏó´«Ã½

Mae galwadau am ddatganoli pwerau dros drethi ar hediadau i Gymru wedi eu gwrthod gan Lywodraeth y DU.

Roedd adroddiad ym mis Mehefin yn dadlau y dylai gweinidogion Cymru reoli'r dreth teithwyr awyr erbyn 2021.

Ond mae gweinidogion Prydeinig wedi dweud eu bod yn bryderus y gallai Llywodraeth Cymru ddefnyddio'r pwerau i hyrwyddo Maes Awyr Caerdydd ar draul Maes Awyr Bryste.

Mae'r penderfyniad yn "gwbl afresymol" yn ôl Gweinidog Cyllid Cymru, Rebecca Evans.

Mae teithwyr ar hediadau dros 2,000 o filltiroedd yn talu treth o £78, tra bod teithwyr dosbarth cyntaf ar hediadau pell yn talu £172.

Mae gweinidogion ym Mae Caerdydd wedi bod yn galw am ddatganoli pŵer dros y dreth ers tro, gan ddweud y gallai ei leihau roi hwb i Faes Awyr Caerdydd.

Llywodraeth Cymru sydd berchen y maes awyr ers 2013.

Mae llythyr Simon Clarke AS, ysgrifennydd yn y Trysorlys, yn dweud bod meysydd awyr Caerdydd a Bryste, sydd tua 60 milltir o'i gilydd, yn gwasanaethu'r un farchnad.

Pryder gweinidogion Prydeinig ydy y byddai gallu Llywodraeth Cymru i leihau'r dreth i hyrwyddo Maes Awyr Caerdydd "yn naturiol yn cael effaith ar Faes Awyr Bryste".

Mae'r dreth wedi ei datganoli yn llwyr neu'n rhannol i'r Alban a Gogledd Iwerddon, ond fe wnaeth Llywodraeth Yr Alban benderfynu peidio â thorri'r dreth ar ôl cyhoeddi argyfwng hinsawdd.

Mae Llywodraeth Cymru hefyd wedi datgan bod argyfwng hinsawdd yma.

Yn y gorffennol mae Gweinidog yr Economi a Thrafnidiaeth Cymru, Ken Skates, wedi dweud y byddai ond yn torri'r dreth petai'n annog teithwyr i hedfan o Gaerdydd yn lle gyrru i feysydd awyr eraill, ac felly bod llai o allyriadau carbon yn sgil y teithiau ffordd byrrach.

Wedi'r penderfyniad, dywedodd Ms Evans bod "Llywodraeth y DU yn rhedeg allan o resymau dros beidio â rhoi Cymru ar yr un lefel â'r Alban a Gogledd Iwerddon".

Ychwanegodd bod safbwynt Llywodraeth y DU yn "groes i resymeg".

Dywedodd Mr Skates bod "penderfyniad afresymol" Llywodraeth y DU yn "cyfyngu ar ein gallu i hyrwyddo Cymru i farchnadoedd tramor ar adeg pan mae angen gwneud hynny fwyaf".