´óÏó´«Ã½

Fe wnaeth adrannau brys ysbytai Cymru gofnodi eu ffigyrau perfformiad gwaethaf am y trydydd mis yn olynol ar gyfer Tachwedd.

Mae'r ystadegau hefyd yn dangos dirywiad yn amseroedd ymateb y gwasanaeth ambiwlans, sydd wedi methu cyrraedd eu targed am y tro cyntaf ers i'r meini prawf newydd gael eu cyflwyno yn 2015.

Mae ffigyrau Tachwedd yn dangos fod llai na thri chwarter y cleifion mewn adrannau brys - 74.4% - wedi cael eu trin, eu trosglwyddo neu fynd i mewn i'r ysbyty o fewn pedair awr.

Targed Llywodraeth Cymru yw 95%.

Mae'r ffigwr yn waeth nag ym mis Hydref, sef 75.4%, ac mae 5.7 pwynt canran yn is na'r un cyfnod y llynedd.

Fe wnaeth 5,890 o gleifion dreulio 12 awr neu fwy mewn adran frys ym mis Tachwedd. Mae'r targed swyddogol yn dweud na ddylai neb dreulio cyhyd mewn adran frys.

Ond nodwedd bwysig o'r ffigyrau diweddaraf yw amseroedd ymateb ambiwlans i'r galwadau 999 mwyaf difrifol.

Ym mis Tachwedd fe ymatebwyd i 61.4% o'r galwadau hynny o fewn wyth munud.

Dyma'r tro cyntaf i'r targed o 65% gael ei fethu ers i feini prawf newydd gael eu cyflwyno yn Hydref 2015.

Y ffigwr yn Nhachwedd 2018 oedd 72.3%.

Wrth ymateb i'r ffigyrau dywedodd llefarydd ar ran Llywodraeth Cymru: "Y mis diwethaf oedd y Tachwedd prysuraf erioed yn ein hadrannau achosion brys.

"Hwn hefyd oedd y mis prysuraf ar gyfer y galwadau 'coch' mwyaf difrifol i'r Gwasanaeth Ambiwlans yng Nghymru. Hoffem ddiolch i staff y GIG a gwasanaethau cymdeithasol sy'n parhau i ddarparu gofal rhagorol yn ystod y cyfnod prysur hwn.

"Mae'n amlwg bod pwysau ar draws y system, gan gynnwys cynnydd mewn achosion o ffliw a norofeirws mewn ysbytai, wedi effeithio ar berfformiad gofal brys y mis hwn ac mae'n siomedig gweld y targed ar gyfer galwadau ambiwlansys coch yn cael ei golli am y tro cyntaf.

"Fodd bynnag, er gwaethaf y cynnydd yn y galwadau, arhosodd yr ymateb cyfartalog yn y categori hwn ar 6 munud a 39 eiliad, ac fe wnaethom gyrraedd 73% o gleifion mewn 10 munud. Yr ydym hefyd wedi gweld gwelliannau mewn amseroedd aros am brofion diagnostig a therapi o'u cymharu â mis Hydref."

Roedd yna ymateb chwyrn i'r ystadegau ymhlith y gwrthbleidiau.

Dywedodd llefarydd iechyd y Ceidwadwyr Cymreig, Angela Burns AC: "Os cefais fy mrawychu gan ffigyrau mis diwethaf, mae'r rhain, â bod yn blaen, yn fy ffieiddio...

"Rydym, ar y cyfan, wedi cael dechrau mwyn i'r gaeaf, ers ffigyrau Tachwedd, felly rwy'n ofni meddwl beth fydd ffigyrau Rhagfyr, yn cynnwys cyfnod y Nadolig."

Mae'r ystadegau'n "gywilyddus", medd llefarydd iechyd Plaid Cymru, Helen Mary Jones.

"Newidiodd Llywodraeth Cymru'r ffordd o gofnodi amseroedd ateb y gwasanaeth ambiwlans, yn honedig, i amlygu perfformiad y gwasaneth yn fwy cywir... nawr does dim modd cyrraedd y targedau newydd," dywedodd.