´óÏó´«Ã½

Mae'r Prif Weinidog Mark Drakeford wedi dweud nad yw'n gwestiwn os fydd y cyfyngiadau presennol yn sgil y coronafeirws yn parhau, ond yn hytrach "sut y byddant yn parhau".

Yn ei gynhadledd ddyddiol i'r wasg awgrymodd Mr Drakeford y gallai'r mesurau gael eu hymestyn ymhellach.

Ond dywedodd fod y mesurau presennol i atal ymlediad Covid-19 yn gwneud gwahaniaeth ac yn achub bywydau, gan gadarnhau unwaith eto y bydd rhyw fath o gyfyngu ar deithio yn parhau "am beth amser eto".

Dywedodd Mr Drakeford y byddai'n fodlon ystyried rhoi mwy o bwerau i heddluoedd rwystro pobl rhag teithio i ail gartrefi yng Nghymru, petai lluoedd yn gofyn.

Yn ystod y dydd cyhoeddodd Iechyd Cyhoeddus Cymru bod 29 yn fwy o bobl gyda coronafeirws wedi marw. Bellach mae cyfanswm y meirw yma yn 315.

Yn ogystal, cofnodwyd 502 o achosion newydd o'r feirws yng Nghymru gan ddod â'r cyfanswm i 4,591.

Fe fydd llywodraethau'r DU, Cymru, Yr Alban a Gogledd Iwerddon yn adolygu'r cyfyngiadau'r wythnos nesaf.

Er y gallai hynny arwain at dynhau'r cyfyngiadau, dywedodd Mr Drakeford ei fod yn gobeithio nad dyna fyddai'n digwydd.

Pwysleisiodd hefyd y byddai unrhyw newidiadau yn cael eu gwneud ar ôl ystyried tystiolaeth feddygol.

"Dwi ddim am roi'r syniad na'r gobaith y bydd y cyfyngiadau yn dod i ben yn fuan iawn.

"Wrth sgwrs rwy'n gwybod fod pobl am weld goleuni ymhen y twnnel, ond rwyf hefyd am i bobl ddeall y byddwn yn byw gyda rhyw faint o gyfyngiadau am wythnosau eto."

Cafodd Mr Drakeford ei feirniadu gan rai am gyhoeddi'r estyniad cyn gweinidogion San Steffan, ond dywedodd dydd Gwener mai dyna oedd y "peth iawn i'w wneud".

"Fe fyddaf yn gwneud cyhoeddiadau am bethau sy'n iawn i Gymru pan mae'n briodol i wneud hynny.

"Fyddai ddim yn edrych dros fy ysgwydd ar beth mae pobl eraill yn ei wneud."

Cafodd ei holi ynglŷn â chryfhau pwerau'r heddlu er mwyn rhwystro pobl rhag teithio i dai haf yng Nghymru.

Dywedodd pe bai'r heddlu yn dod ato a gofyn am fwy o bwerau, yna byddai'n ystyried hynny.

Y nod, meddai, oedd cael pobl i gydweithredu, gan ddweud y byddai hynny'n well na gorfod eu cosbi.

Mae arweinydd Plaid Cymru wedi dweud y dylai'r rhai sy'n anwybyddu'r cyfyngiadau wynebu dirwyon o £1,000.

Dywedodd Adam Price nad oedd y neges mai "argyfwng cenedlaethol nid gwyliau cenedlaethol yw hyn" yn cael ei gydnabod gan bawb.