´óÏó´«Ã½

Mae'r her sy'n ein hwynebu ni gyda coronafeirws wedi dangos i bobl beth yw "cryfder" datganoli, yn ôl y Prif Weinidog Mark Drakeford.

Wrth siarad â Dewi Llwyd ar raglen Dros Ginio ddydd Llun dywedodd: "Ar ôl ugain mlynedd o ddatganoli, nawr ma' nifer o bobl yn Llundain yn deffro i'r ffaith bod y system wedi newid.

"Mae lot o bobl nawr wedi dysgu mae cyfrifoldebau 'da ni yng Nghymru ac yn yr Alban ac yn y blaen. Cyfrifoldebau gwahanol a lan i ni yng Nghymru mae gwneud penderfyniadau sy'n addas i ni.

"'Wy'n meddwl fod pobl yn gallu gweld y cryfder o'r system sydd 'da ni nawr."

Gwadodd yr honiad ei fod am wneud pethau yn wahanol yng Nghymru gan taw llywodraeth Lafur oedd yma, gan ddweud: "Dwi isie i ni symud fel un Deyrnas Unedig 'da'n gilydd."

Er yn canmol y cydweithio rhwng y gwledydd pan fo hynny'n digwydd, dywedodd ei fod wedi gofyn i Weinidog y Cabinet, Michael Gove am gyfarfodydd wythnosol, gan "nad yw'r cyfleon yn dod mewn patrwm digon dibynadwy i fi".

"Doed dim rhaid siarad 'da Boris Johnson bob tro," meddai. "Dwi'n hapus i siarad gyda eraill yn San Steffan pan mae 'na bynciau penodol yn dod dan eu cyfrifoldebau nhw."

Dywedodd nad yw'n ystyried llacio a thynhau rhanbarthol ar y cyfyngiadau ar hyn bryd, gan nad oedd yn "rhywbeth ymarferol i 'neud".

"I redeg un system gwahanol mewn un rhanbarth o Gymru i'r llall, dwi'n meddwl fod hwnna yn gymhleth dros ben, yn anodd i roi negeseuon clir i bobl, anodd i'r heddlu a pobl eraill i fynd ar ôl systemau sy'n wahanol o un lle yng Nghymru i'r llall."

Serch hynny dywedodd ei fod yn "hapus i ddal i siarad" ond doedd e ddim yn gweld "taw dyna'r ffordd orau i neud pethau".