´óÏó´«Ã½

Mae'r Prif Weinidog wedi dweud ei fod yn cydymdeimlo gydag ymgyrch Black Lives Matter, ond ei fod yn gobeithio y gall pobl ganfod ffyrdd gwahanol i brotestio yn ystod y pandemig.

"Mae 'na ffyrdd eraill sydd ddim yn peryglu iechyd cyhoeddus," meddai Mark Drakeford.

Fe wnaeth torfeydd o bobl brotestio ar draws Cymru a thu hwnt ddydd Sadwrn yn dilyn marwolaeth George Floyd yn yr Unol Daleithiau.

Cafodd rhagor o ddigwyddiadau tebyg gael eu cynnal ddydd Sul, ble daeth tua 200 o bobl i brotestio ym Merthyr Tudful.

Roedd mygydau'n cael eu dosbarthu yno gan drefnwyr y brotest, ac roedd nifer o'r protestwyr ddydd Sadwrn hefyd yn gorchuddio eu hwynebau a'n gwisgo a menig er mwyn ceisio atal lledaeniad coronafeirws.

"Rwy'n deall yn llwyr pa mor gryf mae pobl yn teimlo, sydd wedi arwain at olygfeydd fel y gwelon ni ddoe," meddai Mr Drakeford ar raglen Politics Wales ddydd Sul.

"Roeddwn i'n gobeithio y byddan nhw'n ei wneud mewn ffordd wahanol oherwydd rwy'n meddwl bod ffyrdd eraill sydd ddim yn peryglu iechyd cyhoeddus.

"Ond mae'n rhaid i mi bwysleisio iddyn nhw eto, ry'n ni yng nghanol argyfwng iechyd cyhoeddus.

"Mae 'na ffyrdd eraill y gallwch chi brotestio.

"Roedd 'na brotestiadau ar-lein ddoe, mae 'na ddeisebau, mae 'na sefydliadau allwch chi ymuno ag ymgyrchu gyda nhw.

"Rwy'n dweud wrth bobl Cymru - plîs peidiwch rhoi eich hun yn y sefyllfa ble mae eich teimladau cryf - teimladau rwy'n rhannu gyda Black Lives Matter - yn eich arwain at wneud pethau sy'n eich rhoi chi ac eraill mewn perygl."

Roedd cyn-arweinydd y Ceidwadwyr Cymreig, Andrew RT Davies wedi beirniadu'r protestiadau, gan ddweud bod y lluniau o'r digwyddiadau yn "awgrymu bod y cyfyngiadau coronafeirws a chadw pellter cymdeithasol ar ben".