´óÏó´«Ã½

Mae'r cynnydd mewn sbwriel ers i siopau tecawe agor yn "siomedig", yn ôl rhai cynghorau a Chadw Cymru'n Daclus.

Daw ar ôl wythnosau "gwych" o "ddim sbwriel yn unlle" yn ystod wythnosau cyntaf y cyfnod clo, meddai'r elusen.

Ond mae Cadw Cymru'n Daclus yn credu bod agweddau wedi newid tuag at sbwriel wrth i bobl dreulio mwy o amser yn eu hardaloedd lleol, a bydd hynny yn arwain at welliannau.

"Yn anffodus, wrth i ni allu aros allan yn hirach, mae rhai pobl wedi bod yn gadael mwy o sbwriel," meddai Louise Tambini, dirprwy brif weithredwr Cadw Cymru'n Daclus.

"'Da ni wedi cael llawer iawn mwy o gwynion... am sbwriel yn cael ei adael mewn parciau ac ar draethau."

Gobaith Ms Tambini ydy y bydd pobl yn fwy tebygol i godi sbwriel maen nhw'n ei weld.

Ychwanegodd: "Os ydy pobl leol yn flin yna mae'n bosib y bydda nhw'n herio pobl sy'n gadael sbwriel neu sydd ddim yn ymddwyn yn briodol.

"Fe all y meddylfryd yna gael effaith hirdymor."

'Bwyd brys a sbwriel yn mynd law yn llaw'

Yn dilyn y cynnydd mewn achosion o sbwriel, mae cangen Plaid Cymru ym Mlaenau Gwent wedi creu deiseb sy'n gofyn bod rhifau cofrestru cerbydau yn cael eu nodi ar becynnau bwyd o fwytai tecawê gyda gwasanaeth drive-though.

Hyd yma, mae 3,000 o lofnodion ar y ddeiseb.

Dywedodd LlÅ·r Gruffydd AS: "Mae'r cynnydd mewn sbwriel yng Nghymru yn poeni nifer o bobl ar draws y wlad, gan gynnwys yn fy etholaeth i.

"Mae'n edrych fel bod bwyd brys a sbwriel yn mynd law yn llaw, ac mae angen datrysiad hirdymor i fynd i'r afael â'r mater."

Mae Traffig Cymru wedi rhoi rhybudd ar Twitter ar ôl sylwi ar fwy o sbwriel wrth ochr ffyrdd.

Nid yw pob cyngor wedi nodi cynnydd mewn sbwriel, tra bod eraill yn dweud bod mwy o lanhawyr wedi cael eu defnyddio.

Ond dywedodd Cyngor Powys bod lleihad mawr wedi bod yn amlwg yn ystod cychwyn y cyfnod clo ond bod biniau yn llawn pedair awr ar ôl i fwyty McDonald's agor yn Y Drenewydd, a bod un person wedi cael dirwy.

Ym Mlaenau Gwent, gwelwyd cynnydd mewn sbwriel wrth ochr y ffordd ac mewn meysydd parcio. Yr un oedd y darlun yn Sir y Fflint, Sir Fynwy a Thorfaen.

Yn ôl Dr Christian Dunn, arbenigwr mewn microblastigau o Brifysgol Bangor, mae cynnydd bach mewn sbwriel yn gallu cael effeithiau pellgyrhaeddol.

"Os ydych chi'n taflu potel ddŵr blastig i ffwrdd yna fe all y darn plastig yna dorri'n ddarnau man," meddai.

"Y broblem ydy 'da ni ddim yn gwybod effaith llawn y microblastig yna. Mae ymchwil yn dangos bod darn bach o blastig yn gallu gollwng cemegau niweidiol."