´óÏó´«Ã½

Mae rhestr o'r cynghorau sydd yn bwriadu ailagor ysgolion am dair wythnos yn unig o 29 Mehefin yn tyfu.

Bwriad gwreiddiol Llywodraeth Cymru oedd y byddai ysgolion yn agor am bedair wythnos, cyn cau am yr haf ar 24 Gorffennaf.

Ond roedd undebau'n poeni y byddai hyn yn achosi problemau i gytundebau staff.

Gan mai mater i'r cynghorau yw penderfynu yn y pen draw, mae nifer cynyddol o awdurdodau lleol wedi cyhoeddi na fydd eu hysgolion yn agor am fwy na tair wythnos o ddydd Llun nesaf ymlaen.

Fore dydd Llun fe gyhoeddodd Cyngor Gwynedd, mewn llythyr at rieni a gofalwyr y sir, na fyddai'r ysgolion yno ar agor am fwy na thair wythnos - gan ymuno gyda phenderfyniad cynghorau Abertawe, Caerdydd, Caerffili, Blaenau Gwent, Pen-y-bont ar Ogwr, Sir Fynwy, Sir Ddinbych, Sir Gaerfyrddin, Sir y Fflint, Casnewydd a Wrecsam i gau wedi tair wythnos.

Yn y llythyr, dywedodd Pennaeth Addysg Cyngor Gwynedd, Garem Jackson: "...deallwn na all Llywodraeth Cymru a'r undebau llafur ddod i safbwynt cyffredin cenedlaethol ynghylch y bedwaredd wythnos (20-24 Gorffennaf), er gwaetha'r trafodaethau maith. O'r herwydd, bydd ysgolion Gwynedd yn cau ar gyfer gwyliau'r haf ar 17 Gorffennaf".

Cafwyd cadarnhad mewn llythyr gan Gyngor Ceredigion fore dydd Llun hefyd na fydd ysgolion y sir yn agor yn hirach na thair wythnos o 29 Mehefin.

Dywedodd y Cyngor: "Mae Cyngor Ceredigion a'n holl ysgolion yn siomedig iawn nad ydym mewn sefyllfa i agor am y bedwaredd wythnos fel a gyhoeddwyd yn wreiddiol.

"Mae hyn o ganlyniad i'r ffaith nad yw Llywodraeth Cymru wedi gallu sicrhau cytundeb gydag Undebau Llafur eu bod yn bwriadu ymestyn y tymor ysgol.

"Oherwydd hyn, byddai staff allweddol mewn ysgolion yn gweithio'n groes i'w contract cyflogaeth yn ystod y bedwaredd wythnos wirfoddol."

Ychwanegodd y llythyr: "Mae nifer o staff eisoes yn methu â mynychu safleoedd ysgolion am resymau meddygol teilwng, a gallai'r wythnos ychwanegol arwain at rai ysgolion yn brin o staff, ac o bosibl yn methu ag agor o gwbl.

"Bydd ysgolion Ceredigion felly yn cau i ddisgyblion ar ddyddiad gwreiddiol diwedd tymor yr haf, sef 17 Gorffennaf."

Bydd ysgolion Conwy a Phowys yn dychwelyd am bedair wythnos ac mae Cyngor Ynys Môn eisoes wedi cyhoeddi na fydd ysgolion y sir yn ailagor ar 29 Mehefin "o ganlyniad i'r cynnydd diweddar mewn achosion positif o'r coronafeirws ar yr ynys".

Bydd y sir yn cynnal trafodaethau pellach yr wythnos hon cyn penderfynu os byddant yn ailagor o gwbl cyn diwedd y tymor.

Mae'r gwahaniaeth mewn dyddiadau diwedd tymor yn dilyn anghytuno rhwng y llywodraeth ac undebau.

Mae trafodaethau yn parhau ond mae rhai cynghorau wedi gwneud penderfyniad terfynol am "nad yw hyn yn rhywbeth y gellir ei adael tan y funud olaf".

Dywedodd llefarydd ar ran Llywodraeth Cymru eu bod yn parhau i awgrymu ymestyn y tymor, a'u bod yn "cydnabod mai penderfyniad i'r awdurdodau ydy hyn yn y pendraw".

Dywed Llywodraeth Cymru hefyd eu bod yn credu y byddai wythnos ychwanegol cyn yr haf yn "bwysig iawn i helpu ysgolion i gymryd dull graddol o gefnogi pob plentyn a pherson ifanc."

Ond dywedodd Cyngor Wrecsam fod y llywodraeth yn rhoi "ysgolion a'r cyngor mewn sefyllfa anodd iawn".

"Nid oes unrhyw rwymedigaeth cytundebol i staff weithio'r wythnos ychwanegol - gan roi'r cyfrifoldeb ar benaethiaid a staff unigol, sy'n annheg," meddai llefarydd mewn datganiad.