´óÏó´«Ã½

Gall mwy o bobl gael brechiad ffliw am ddim y gaeaf hwn, yn ôl y gweinidog iechyd Vaughan Gething.

Mae hyn yn dilyn cyhoeddiad tebyg yn Lloegr, rhag ofn y bydd cynydd eto mewn achosion coronafeirws.

Ond dywedodd Mr Gething nad oedd yn gallu sicrhau y byddai'n yn digwydd yma, gan nad oedd wedi cael unrhyw gadarnhad o gynlluniau Llywodraeth y DU.

Dywedodd ei bod yn "siomedig" nad oedd gwledydd y DU wedi dod i gytundeb ynglÅ·n ag ehangu'r rhaglen frechu yn erbyn ffliw.

Brechu pobl dros 50

"Mae 'na system ar draws y DU ar gyfer cyflenwi'r brechlyn ffliw," meddai Mr Gething wrth ´óÏó´«Ã½ Radio Wales.

"Llywodraeth y DU sy'n prynu'r brechlyn ar gyfer y pedair gwlad, felly fe ddylai bod digon o frechlyn ffliw ar gael yng Nghymru i gyd-fynd â'r ffordd y mae gwledydd eraill y DU yn mynd o'i chwmpas hi."

Dywedodd nad oedd yn gwybod ymlaen llaw fod y cyhoeddiad ynglŷn â Lloegr am gael ei wneud.

Mae defnydd o'r brechiad yn cael ei ehangu yno rhag ofn y bydd cynnydd coronafeirws yn digwydd yr un pryd â'r ffliw tymhorol.

"Byddwn i'n disgwyl cysondeb rhwng cyngor y pedwar prif swyddog meddygol," meddai Mr Gething.

"Os oes digon o frechlyn ffliw ar gael dwi wir ddim yn gweld unrhyw reswm dros fod yn anghyson."

Yn ddiweddarach cyhoeddwyd datganiad gan Lywodraeth Cymru yn rhoi rhagor o fanylion am y cynlluniau.

Yn amodol ar gadarnhad gan Lywodraeth y DU y bydd cyflenwad ychwanegol o'r brechlyn ar gael, bydd y canlynol yn cael eu cynnwys yn y rhaglen frechu ffliw hefyd:

Bydd y Gwasanaeth Iechyd Gwladol (GIG) yn cysylltu â'r unigolion hynny sy'n gymwys.

Bydd cyflenwadau ychwanegol o'r brechlyn ar ffurf chwistrell trwyn, sy'n cael ei gynnig i blant, yn cael eu defnyddio i sicrhau bod y nifer mwyaf posibl o blant yn cymryd rhan yn y rhaglen frechu.

Ychwanegodd Vaughan Gething: "Drwy gynnig y brechlyn rhag y ffliw i fwy o bobl nag erioed o'r blaen, gallwn helpu i atal pobl rhag mynd yn sâl a lleihau'r pwysau ar y GIG y gaeaf hwn.

"Byddwn yn annog unrhyw un sy'n gymwys i gael y brechlyn i'w gael."