´óÏó´«Ã½

Mae canolwr Cymru a'r Dreigiau, Jamie Roberts wedi cael prawf positif am coronafeirws, ddyddiau'n unig cyn i gynghrair y Pro14 ailddechrau.

Fe wnaeth Roberts ymuno â'r Dreigiau ddechrau Awst, ac maen nhw i fod i herio'r Gweilch ddydd Sul.

Dywedodd y Dreigiau nad oes gan Roberts symptomau a'i fod yn teimlo'n iach, ond y bydd nawr yn hunanynysu ac felly ni fydd ar gael i chwarae.

Mae gweddill y chwaraewyr wedi cael eu profi ddydd Mawrth ac mae disgwyl iddyn nhw gael y canlyniadau ddydd Mercher.

Pe bai mwy o chwaraewyr y Dreigiau'n cael prawf positif fe allai'r gêm yn erbyn y Gweilch gael ei gohirio.

Fe wnaeth y canolwr 33 oed ddychwelyd i Gymru o Dde Affrica ar ddechrau'r pandemig yn dilyn cyfnod yn chwarae dros y Stormers.

Yn ystod yr argyfwng bu Roberts, sydd wedi cymhwyso fel meddyg, yn gwirfoddoli gyda Bwrdd Iechyd Caerdydd a'r Fro fel rhan o'u hymgyrch i godi ymwybyddiaeth am coronafeirws.