´óÏó´«Ã½

Yn lle gwneud y rhestr yna o addunedau i ymarfer corff, colli pwysau, arbed mwy o bres, yfed llai, beth am feddwl am ffyrdd o fod yn fwy caredig gyda'n hunain a'n helpu i fagu cryfder emosiynol i wynebu pa newid bynnag a ddaw yn y flwyddyn sydd i ddod?

Alyson Jenkins, lifecoach sy'n helpu ei chwsmeriaid gyda'u bywydau personol a phroffesiynol, sy'n awgrymu pum peth i chi eu gwneud er mwyn mwynhau a chadw meddylfryd iach yn yn 2021.

Mae bywyd yn gallu bod yn anodd, ac ar brydiau mae eisiau cymorth a chefnogaeth. Dyma bum pwynt sy'n tarddu o ddoethineb llawer o bobl drwy'r oesau gydag awgrymiadau am rai o'r pethau ymarferol gallwn eu gwneud er mwyn i ni brofi'r gorau mewn bywyd.

Dyma air hyfryd sydd yn cwmpasu'r cwestiwn, beth sydd yn werthfawr yn eich bywyd? Beth yw'r trysor sydd gennych? Ac mae gan bob un ohonom rywbeth i fod yn ddiolchgar amdano. Rhowch ddiolch bob dydd am yr hyn sydd o werth mewn bywyd.

O fy rhan i mae'r rhain yn cynnwys iechyd, y synhwyrau, teulu, adar, miwsig, ffrindiau, bwyd a … unwaith dechreuaf, mae'n amlwg fod gymaint sydd yn rhoi pleser. Digon i fod yn ddiolchgar amdano.

Mae ymchwil niwrowyddoniaeth wedi datgelu pwysigrwydd caredigrwydd i'n hiechyd. Wrth fod yn garedig mae ein corff, emosiynau a'n ymennydd yn elwa; mae cymdeithas yn elwa, mae'r byd yn elwa.

Amlwg efallai, ond mae'n werth atgoffa ein hunain yn rheolaidd. Un peth arall pwysig yw hunan-dosturi. Heb garu ein hunain a bod yn garedig i ni ein hunain mae'n rhy anodd i ymestyn hyn i bobl eraill.

Stopio a sylwi. Pan rydyn ni'n brysur, neu pan ein bod yn hel meddyliau mae'n anodd stopio. Pa mor aml ydych chi'n stopio a wir yn sylwi ar beth sydd yn digwydd - tu allan a thu fewn i chi eich hun?

Digon hawdd yw bod yn segur, a gwir, mae hi'n anodd ar brydiau i symud o'r soffa ond ydi? Er hynny, mae symud yn gwneud gymaint o les i ni - ar y pryd ac yn y tymor hir. I mi, mae'n bwysig i fynd am dro bach, bron pob dydd - i gael awyr iach yn ogystal ag ymarfer corff. Yn ogystal â'r gampfa, nofio, cerdded neu redeg, mae digon o bethau eraill gallwn wneud sydd hefyd yn hwyl. Bydd symud yn atal pob math o wendid corfforol.

Mae gan bob plentyn gymaint o chwilfrydedd. Wrth i ni dyfu gall hwn leihau i'r graddau lle mae'r 'sbarc' yn diffodd.

Mae ymchwilio, archwilio, darganfod, dysgu i gyd yn bwysig i greu egni ac i'n diddanu ni. Mae gymaint i'w ddarganfod yn y byd, gymaint o gwestiynau, pobl ddiddorol, storiâu, byd natur - rhestr ddiderfyn.

Dim ond pum pwynt bach yw'r rhain ac mae gymaint mwy i'w ddweud a'i wneud ar gyfer mwynhau bywyd. Cofiwch, o'r tu fewn daw ein hapusrwydd.

Hefyd o ddiddordeb: