´óÏó´«Ã½

Mae "cynnydd sylweddol" wedi bod yn nifer y dysgwyr Cymraeg a gweithgareddau dysgu yn ystod y pandemig, yn ôl Gweinidog y Gymraeg ac Addysg.

Dywedodd Jeremy Miles fore Mercher fod y ffigyrau wedi cynyddu'n "sylweddol" dros y flwyddyn diwethaf, gyda'r "lefel o ddarpariaeth yn nhermau y nifer y gweithgareddau dysgu wedi cynyddu bron i 50% o flwyddyn i flwyddyn".

Daw wrth i Lywodraeth Cymru gyhoeddi , sef y corff sy'n cynnig cyrsiau ac adnoddau ar gyfer dysgu'r iaith i oedolion.

Yn ôl yr adolygiad, mae'r ganolfan wedi "llwyddo i ad-drefnu, ailstrwythuro ac arwain y ddarpariaeth Dysgu Cymraeg genedlaethol".

Ar Dros Frecwast ar ´óÏó´«Ã½ Radio Cymru, dywedodd Mr Miles fod comisiynu adolygiad o'r fath yn "gyfle i'n hatgoffa ni o'r cyfraniad mae dysgwyr yn ei wneud, a'r cyfraniad mae'r ganolfan yn ei wneud i gael siaradwyr a dysgwyr Cymraeg".

Ac er gwaethaf heriau'r pandemig, dywedodd y gweinidog fod y ganolfan wedi cipio'r cyfle i arloesi'n ddigidol gan roi'r cyfle i lawer mwy o bobl gael dysgu'r Gymraeg.

'Calonogol iawn'

Mae'r cynnydd mewn dysgwyr a'r cyfleoedd i ddysgwyr yn "beth calonogol iawn", meddai.

"Mae angen gwneud yn siŵr bod cymaint o blant â phosib yn cael mynediad at addysg Gymraeg ac yn gadael yr ysgol yn medru'r Gymraeg yn hyderus, yn siaradwyr dwyieithog.

"Ond ynghyd â hynny mae'n rhaid cydnabod bod pobl yn dysgu mewn cyfnodau gwahanol yn eu bywydau; nid pawb sydd wedi cael y cyfle i ddysgu'r Gymraeg yn yr ysgol felly mae'n bwysig gweld hyn fel menter gydol oes."

Yn ogystal â dysgu'r Gymraeg, ychwanegodd bod yn rhaid canolbwyntio hefyd ar gynyddu'r cyfleoedd i ddefnyddio'r Gymraeg.

Daw'r adolygiad o weithgaredd y Ganolfan Dysgu Cymraeg Cenedlaethol ar adeg arbennig i Gymru, gyda'i mentrau iaith yn dathlu 30 mlynedd ers sefydlu'r fenter cyntaf yng Nghwm Gwendraeth ger Llanelli yn 1991.

Erbyn hyn mae 22 o fentrau dros Gymru er mwyn hybu a hyrwyddo'r Gymraeg ar draws y wlad.

Maent yn cael eu hariannu'n rhannol gan Lywodraeth Cymru, sydd wedi gosod nod uchelgeisiol o greu miliwn o siaradwyr Cymraeg erbyn 2050.

'Proses o esblygu'

"Byddai'r Gymraeg yn lawer tlotach heb y gwaith mae'r mentrau yn ei wneud yn ein cymunedau," meddai Mr Miles.

"Mae wedi bod yn broses o esblygu dros y degawdau diwethaf ac yn y flwyddyn diwethaf, ni wedi gweld hynny'n digwydd hyd yn oed yn fwy.

"Mae 'na addasu wedi bod yng ngwaith y mentrau; mae wedi bod yn gyfnod heriol iawn, ond mae llawer o weithgareddau wedi eu darparu mewn ffordd rhithiol."

Ers dechrau'r pandemig, mae'r mentrau gwahanol wedi cynnal dros 7,000 o ddigwyddiadau digidol rhyngddynt.

Ychwanegodd Mr Miles: "Ni [y Llywodraeth] eisiau esblygu ymhellach yn y dyfodol gyda'r mentrau fel partneriaid.

"Ni eisiau sicrhau bod cymunedau lleol o ran economi a gofodau Cymreig yn ffynnu - dyna yw'r nod."