´óÏó´«Ã½

Mae ysgol anghenion arbennig ym Mhenarth yn apelio am help i ddod o hyd i offer syrffio gwerth miloedd o bunnoedd sydd wedi'i ddwyn o un o'i drelars.

Roedd y padlfyrddau, byrddau syrffio, wetsuits ac offer arall Ysgol y Deri wedi'i brynu yn dilyn "ymgyrch galed" i godi arian.

Dywedodd staff fod cynnal gweithgareddau ar y dŵr yn helpu disgyblion i ymlacio a rhyddhau ychydig o'u pryder.

Ychwanegon nhw ei bod yn "ofnadwy" fod yr offer wedi'i ddwyn.

Dywedodd Dan Willmore o dîm cefnogi disgyblion yr ysgol ei fod "mewn sioc" ar ôl clywed ddydd Llun fod rhywun wedi torri mewn i'r trelar.

"Mae'r holl ddisgyblion wedi bod yn rhan o drefnu'r trelar 'na," meddai.

"Yn gorfforol ac yn emosiynol, maen nhw wedi buddsoddi mewn syrffio a phadlfyrddio. I rai disgyblion dyma'r ymyrraeth sy'n gweithio orau iddyn nhw.

"Boed yn syrffio neu badlfyrddio, mae'n helpu nhw i adeiladu perthnasau ac ymddiriedaeth."

Mae Mr Willmore yn mynd allan ar y dŵr gyda disgyblion sawl gwaith yr wythnos, ond dywedodd fod rhai o'r padlfyrddau mor newydd nad oedden nhw wedi cael eu defnyddio.

Mae'n gobeithio, gan eu bod yn eithaf prin, y byddan nhw'n haws i'w canfod.

"Fe wnaeth y plant helpu eu dadbacio nhw a'u rhoi at ei gilydd. Wrth wneud hynny maen nhw'n teimlo'r angen i gymryd gofal ohono," meddai.

Cafodd llawer o'r offer ei brynu yn dilyn ymgyrch godi arian gan yr ysgol a chwmnïau syrffio lleol, ac fe wnaeth Mr Willmore badlfyrddio ar hyd arfordir de Cymru i gasglu arian.

Wrth apelio am wybodaeth gan y cyhoedd, dywedodd llefarydd ar ran Heddlu De Cymru bod y lladrad wedi eu "dychryn".

Ychwanegodd: "Rydym yn gwybod gymaint y mae disgyblion Ysgol Y Deri yn caru syrffio a phadlfyrddio ac rydym yn gwneud popeth posib i gadarnhau pwy sy'n gyfrifol."