´óÏó´«Ã½

Mae dyn 19 oed a helpodd i godi mwy na £60,000 ar gyfer bachgen bach â chanser ar ôl darganfod bod ei gyflwr ei hun yn angheuol wedi marw.

Cafodd Rhys Langford, o Lyn Ebwy ym Mlaenau Gwent, ddiagnosis o osteosarcoma ym mis Hydref 2020.

Mewn neges ar Facebook, dywedodd ei fam iddo farw yn heddychlon yn ei gartref nos Fawrth gyda'i deulu o'i gwmpas.

Rhoddodd £1,000 a chododd mwy na £60,000 i Jacob, bachgen chwech oed sydd hefyd yn byw yng Nglyn Ebwy.

Ysgrifennodd mam Rhys, Catherine Langford: "Mae fy rhyfelwr, fy arwr, fy mab, fy mabi, wedi rhoi'r gorau i'w frwydr.

"Fe rhoddodd ei gleddyf i lawr a bu farw'n dawel gartref gyda'i deulu i gyd o'i gwmpas.

"Mae ein calonnau'n torri. Fydd fy mywyd i byth yr un peth eto."

Pan ddarllenodd Rhys am Jacob, dywedodd wrth ei rieni: "Os nad oes modd gwneud dim i fy helpu i, rwyf am geisio helpu i achub y bachgen bach yma."

Cafodd Jacob ddiagnosis o niwroblastoma yn 2017 ac, ar ôl triniaeth, canfuwyd ei fod yn rhydd o ganser yn 2019.

Ond cafodd ei rieni wybod ym mis Rhagfyr ei bod yn "debygol iawn" mai canser oedd tiwmor newydd ar ei iau.

Bydd yr arian a gododd Rhys yn mynd tuag at driniaeth yn y dyfodol i Jacob, a allai orfod teithio i America i gael triniaeth arbrofol nad yw ar gael ar y GIG.

Mewn neges ar , dywedwyd fod "arwr Jacob" wedi marw, a bod eu meddyliau gyda theulu Rhys "ar yr adeg drist yma".

"[R]ydyn ni i gyd mor falch a diolchgar am yr hyn wnes di dros ein Jacob ni," meddai.