´óÏó´«Ã½

Mae ail long oedd yn cludo tanwydd o Rwsia wedi ei dargyfeirio o Aberdaugleddau yn Sir Benfro.

Roedd tancer Yr Archelaos ar ei ffordd i'r porthladd yn ne'r sir ar ôl cael ei lenwi â disel yn Primorsk, Rwsia.

Roedd disgwyl i ddisel Puma Energy gael ei drosglwyddo i Gymru ddydd Mawrth ar ôl galw yn Le Havre, Ffrainc.

Ond, dywedodd y cwmni na fyddai'r tancer yn galw yn Sir Benfro bellach ac y byddai'n chwilio am ffynonellau disel arall ar gyfer y DU.

Mae gwleidyddion o Gymru eisoes wedi galw am beidio rhoi caniatâd i longau o Rwsia gludo nwyddau i borthladdoedd yma oherwydd ymosodiad Rwsia ar Wcráin.

Daeth hyn ar ôl i long arall gael ei ddargyfeirio o Gymru - oedd hefyd yn dod o Primorsk, Rwsia - yr wythnos ddiwethaf.

Ychwanegodd Puma Energy ei fod yn condemnio'r rhyfel a thrais yn Wcráin.

"Roedd Yr Archelaos wedi'i gyfeirio i Aberdaugleddau er mwyn aros am orchmynion wrth i ni ystyried y sefyllfa ar lawr gwlad ar hyd porthladdoedd y DU," meddai llefarydd ar ran y cwmni.

"O ystyried y datblygiadau diweddar, ni fydd y llong yn galw yn Aberdaugleddau."