����ý

Mae chwaraewyr Cymru'n gwybod y bydd Cwpan y Byd yn gyfle "arbennig" i roi llwyfan byd-eang i'r wlad, meddai Gareth Bale.

Bydd Cymru'n cystadlu yn y twrnament eleni am y tro cyntaf ers 1958.

Mae carfan Rob Page bellach wedi cyrraedd Qatar cyn eu gornest agoriadol yn erbyn UDA ddydd Llun.

Cyn iddyn nhw adael fe ryddhaodd Cymdeithas Bêl-droed fideo o'u cân swyddogol ar gyfer Cwpan y Byd - fersiwn newydd o 'Yma o Hyd' gan Dafydd Iwan sydd yn cynnwys lleisiau'r cefnogwyr.

Yn ôl Bale, mae poblogrwydd y gân yn adlewyrchu'r brwdfrydedd diweddar mewn dysgu mwy am hanes y genedl, gan gynnwys ymhlith y chwaraewyr.

Yn y fideo mae delweddau o'r chwaraewyr yn gymysg â chlipiau sy'n dangos digwyddiadau nodedig yn hanes diweddar Cymru, o brotestiadau iaith a boddi Tryweryn, i streic y glowyr a dyfodiad datganoli.

Mae'r gân ei hun wedi bod yn boblogaidd ymhlith y chwaraewyr ers tro, gyda'r amddiffynnwr Connor Roberts wedi dweud yn y gorffennol ei fod yn gwrando arni cyn pob gêm er mwyn rhoi rhywfaint o "dân yn ei fol".

Roedd chwaraewr mwyaf profiadol y garfan, Chris Gunter, ymhlith y rheiny wnaeth annog y Gymdeithas i wahodd Dafydd Iwan i'w chanu cyn rownd gyn-derfynol y gemau ail gyfle yn erbyn Awstria.

Yn dilyn poblogrwydd y penderfyniad yna fe wnaed yr un peth cyn y ffeinal yn erbyn Wcráin.

Ar ôl y fuddugoliaeth daeth allan ar y cae i ganu unwaith eto, gyda'r chwaraewyr y tro hwn - a Bale yn eu plith.

"Mae pobl yn gwybod mwy am ein hanes ni nawr, hyd yn oed pobl yn ein gwlad ein hunain yn dysgu mwy am ein hanes, ac o le 'dyn ni wedi dod," meddai'r capten wrth ����ý Cymru Fyw.

"Hyd yn oed fel chwaraewyr 'dyn ni dal yn dysgu, achos nawr bod ni'n fwy llwyddiannus mae Cymru'n cael ei siarad amdano lot mwy."

Roedd Bale yn dyst i effaith Euro 2016 ar Gymru yn nhermau pêl-droed, gan ysbrydoli eu rhediad i'r rownd gyn-derfynol cyn helpu'r tîm i gyrraedd Euro 2020 hefyd.

Ond mae'n gwerthfawrogi hefyd beth yw effaith ehangach cyrraedd twrnament rhyngwladol i wlad gymharol fechan fel Cymru, gan gynnwys y cyfle eleni i gynrychioli'r wlad ar y llwyfan mwyaf un.

"Dyw e ddim jyst am y pêl-droed, dwi'n meddwl bod ni'n sôn am dwf y wlad fan hyn hefyd," meddai.

"Gobeithio yn y dyfodol, pan 'dych chi'n siarad â phobl o wledydd eraill fyddan nhw ddim yn gofyn lle mae Cymru, achos byddan nhw'n gwybod.

"Ac mae hwnna'n rhan arbennig o'n stori ni hefyd."