´óÏó´«Ã½

Mae arweinydd Plaid Cymru wedi dweud ei fod yn "bryderus" am honiadau o "ddiwylliant ofnadwy" yn ei blaid.

Mae Adam Price wedi addo gofyn i holl staff y blaid rannu eu profiadau, a dywedodd y byddai'n dysgu ohonyn nhw.

Ond gwrthododd wneud sylw ar honiadau ei fod yn gwybod am honiadau yn erbyn Aelod o'r Senedd flwyddyn yn ôl.

Mae sawl ffynhonnell wedi dweud bod anesmwythder sylweddol o fewn y blaid ynglŷn â'r ffordd y cafodd yr honiadau eu trin.

Mae Comisiynydd Safonau Senedd Cymru yn ymchwilio i honiadau difrifol yn erbyn Rhys ab Owen, AS Canol De Cymru.

Mae Mr ab Owen wedi ei wahardd gan grŵp y blaid yn y Senedd yn y cyfamser.

Mae ffynonellau wedi honni bod yr honiadau wedi'u codi o fewn y blaid flwyddyn yn ôl.

Clywodd ´óÏó´«Ã½ Cymru yn gynharach yr wythnos hon fod y blaid hefyd wedi comisiynu cwmni adnoddau dynol (HR) i ymchwilio i honiadau o gamymddwyn ym Mhlaid Cymru - sydd ddim yn gysylltiedig â Rhys ab Owen.

Soniodd un ffynhonnell am "ddiwylliant ofnadwy" yn y blaid a "diffyg arweinyddiaeth".

Wrth siarad â ´óÏó´«Ã½ Radio Wales Drive, dywedodd Mr Price: "Rwyf wedi ei gwneud yn glir iawn bod yn rhaid i Blaid Cymru, fel pob plaid, weithio i wella ei diwylliant a sicrhau bod ganddi amgylchedd diogel a chynhwysol i bawb.

"Rwy'n bryderus i ddarllen hyn ac rydym wedi ymrwymo i sicrhau ein bod yn arfer y gwerthoedd hynny o gynhwysiant a chreu gofod diogel.

"O ganlyniad i'r sylwadau hyn, byddwn yn estyn allan at ein holl staff, gan roi lle iddyn nhw rannu eu profiadau'n gyfrinachol.

"Ac rydyn ni wedi ymrwymo, yn hollol, i gymryd unrhyw gamau angenrheidiol o ganlyniad i ddysgu ganddyn nhw."

Pan ofynnwyd iddo a oedd yn ymwybodol o honiadau am Rhys ab Owen flwyddyn yn ôl, dywedodd: "Nid yw'n bosib i ni wneud sylw ar achos sy'n destun ymchwiliad ar hyn o bryd."

Dywedodd hefyd na allai wneud sylw ar ymchwiliad y cwmni HR.