´óÏó´«Ã½

Mae Llywodraeth Cymru yn dweud nad oes cynnig ariannol ffurfiol wedi ei wneud i undebau iechyd cyn y trafodaethau ddydd Iau.

Roedd adroddiadau bod gweinidogion yn ystyried cynnig taliad untro o £1,000 i weithwyr iechyd, sydd ar streic.

Mewn llythyr at yr undebau ddydd Gwener diwethaf, fe gynigiodd y Prif Weinidog Mark Drakeford daliad untro - ond doedd dim sôn am swm penodol yn hwnnw.

Bydd yr undebau'n cyfarfod â gweinidogion ddydd Iau, ond mae ffynhonnell yn y llywodraeth wedi dweud bod dim "ffigyrau pendant ar y bwrdd ar y foment".

"Sïon" yw'r adroddiadau yn ôl ffynhonnell arall, sy'n mynnu bod dim swm pendant wedi ei awgrymu i'r undebau yn ffurfiol.

Byddai taliad ychwanegol o £1,000 ar ben y codiad cyflog sydd eisoes wedi ei gyflwyno yn dod â chynnig eleni'n agosach at lefel y costau byw presennol.

Ond wrth bwysleisio nad oes swm pendant wedi ei grybwyll, mae unigolion o fewn y llywodraeth yn dweud pe byddai'r undebau'n awyddus i drafod, "bydd taliad untro yn destun trafodaeth".

Yn ôl un o'r ffynonellau, mae'r syniad o daliad untro yn "wir ymgais" i ddod â gweithredu diwydiannol i ben a bod dim bwriad i wneud "cynnig pitw".

Dywedodd ffynhonnell, sy'n uchel o fewn un o'r undebau llafur iechyd, y byddai unrhyw gynnig sydd tua £1,000 yn cael ei roi gerbron aelodau.

Ond fe ddywedodd nad yw'n sicr y byddai'n ddigon i sicrhau eu cefnogaeth.

Roedd cynnig y llywodraeth haf diwethaf i roi codiad cyflog o £1,400 i weithwyr yn cynnwys nyrsys, glanhawyr a phorthorion yn gyfystyr â chynnydd o rhwng 4% a 5.5%, gan ddibynnu ar radd yr unigolyn.

Byddai taliad untro o £1,000 yn agosach at lefel chwyddiant, sydd o gwmpas 10.7%

Mae dros 1,000 o weithwyr ambiwlans yng Nghymru sy'n perthyn i undeb y GMB yn cynnal streic 24 awr tan hanner nos, nos Fercher - yr eildro iddyn nhw weithredu o fewn tair wythnos.