´óÏó´«Ã½

Mae undeb athrawon yr NEU wedi canslo deuddydd o streicio oedd wedi'i drefnu ar gyfer yr wythnos nesaf yn dilyn cynnig tâl newydd gan Lywodraeth Cymru.

Dywedodd yr undeb y daw'r penderfyniad yn dilyn "trafodaethau arwyddocaol" gyda'r llywodraeth.

Yn wreiddiol, roedd yr NEU wedi trefnu deuddydd o weithredu diwydiannol ar gyfer 15 a 16 Mawrth - dydd Mercher a dydd Iau yr wythnos nesaf.

Ond nawr bydd yr undeb yn cynnal pleidlais ymysg aelodau ar y cynnig newydd, ac oherwydd hynny mae'r deuddydd o streic wedi'i ganslo.

Dywedodd yr undeb y bydd trafodaethau yn parhau ar faterion fel ariannu ysgolion, pwysau gwaith athrawon, a'r pwysau sy'n cael ei roi gan y corff arolygu ysgolion, Estyn.

Yn flaenorol roedd y llywodraeth wedi dweud wrth undebau athrawon y byddai angen cytuno ar gynnig erbyn 17 Mawrth er mwyn i aelodau gael codiad cyflog eleni.

Ond mewn llythyr at undebau ddydd Gwener dywedodd y Gweinidog Addysg Jeremy Miles, y byddai'n cynyddu cyflogau athrawon wrth i drafodaethau barhau, gan alw am "saib" yn y streicio llawn tan o leiaf diwedd y flwyddyn academaidd.

Dywedodd y byddai'r cynnig - sy'n 8% o gynnydd ar gyfer 2022-23 - yn golygu cymorth ariannol i athrawon yn ogystal â helpu disgyblion, yn enwedig y rheiny sy'n sefyll arholiadau.

Roedd Jeremy Miles wedi dweud ei bod yn "hanfodol nad oes pwysau ychwanegol ar ddisgyblion, yn enwedig y rhai sy'n paratoi ar gyfer sefyll arholiadau, drwy golli rhagor o ddiwrnodau ysgol".

Dywedodd ysgrifennydd Cymru ar gyfer yr NEU, David Evans, eu bod wedi cael "eglurder" gan Lywodraeth Cymru "oedd ddim yno ychydig wythnosau yn ôl".

"Bydd y ffaith fod y cynnig hwn wedi'i ariannu yn llawn yn rhyddhad i'n aelodau," meddai.

"Ry'n ni'n dal yn siomedig nad yw'r gweindigo wedi gallu gwneud cynnig ariannol i staff cefnogol, ond o leiaf nawr mae'n cydnabod yr heriau o ran llwyth gwaith."

Yn dilyn cyhoeddiad yr undeb ddydd Gwener dywedodd Llywodraeth Cymru ei bod yn "croesawu'r penderfyniad i oedi ar y streicio".

"Mae hyn yn newyddion da i ddisgyblion, rhieni a'r proffesiwn," meddai llefarydd.

"Gyda'r gwaith sydd eisoes wedi'i wneud o ran cael pecyn o fesurau mewn lle i leihau llwyth gwaith, ry'n ni'n credu fod hwn yn cynnig tâl da, a gobeithiwn y gall aelodau ei gefnogi."

Mae aelodau undeb NAHT Cymru, sy'n cynrychioli penaethiaid, yng nghanol cyfnod o weithredu diwydiannol hefyd, ond dydyn nhw ddim yn streicio.

Dywedon nhw eu bod yn croesawu cynnig newydd y llywodraeth ond eu bod yn dal i "bryderu" am rannau o'r cynnig gwreiddiol, ac felly'n parhau i gynnal trafodaethau.

Mae undeb NASUWT wedi gwrthod y cynnig hefyd, gyda disgwyl iddyn nhw ofyn am farn aelodau ar weithredu ai peidio.

Ond yn ymateb i'r cynnig diweddaraf dywedodd ysgrifennydd cyffredinol yr undeb y "dylai olygu y bydd athrawon yn cael mwy o arian heddiw, yn hytrach nag addewidion gwag yfory".

Yn ogystal â'r cynnig presennol, mae'r gweinidog wedi cyflwyno cynnig gwell o 5% ar gyfer 2023-24 - sy'n uwch na'r 3.5% gwreiddiol.