´óÏó´«Ã½

Mae dyn 31 oed o Aberdâr wedi ymddangos yn Llys Ynadon Casnewydd wedi ei gyhuddo o geisio llofruddio, ar ôl i yrrwr fan ddosbarthu yng Nghaerdydd gael ei daro a'i lusgo o dan y cerbyd.

Fe ddigwyddodd y gwrthdrawiad brynhawn Mawrth ar Ffordd y Gogledd, sy'n un o'r prif ffyrdd i mewn i ganol y ddinas.

Fe siaradodd Christopher Elgifari yn unig i gadarnhau ei enw, dyddiad geni a'i gyfeiriad yn ystod y gwrandawiad.

Cafodd cais am fechnïaeth ei wrthod gan ynadon, a bydd yn ymddangos yn Llys y Goron Caerdydd ddydd Llun, 3 Ebrill.

Clywodd yr ynadon bod gyrrwr y fan, Mark Lang, yn dosbarthu parseli ar ran cwmni Evri ar Rodfa Laytonia.

Dywedodd cyfreithiwr yr erlyniad, Nicholas Evans: "Pan oedd Mr Lang wedi gadael y cerbyd, fe redodd y diffinydd tuag at ddrws y gyrrwr, a gyrru i ffwrdd."

Dywedodd Mr Evans wrth y llys bod Mr Lang, oedd yn cario parsel ar y pryd, wedi ceisio atal y cerbyd, oedd yn cael ei yrru "ar gyflymder".

Clywodd yr ynadon bod Mr Lang wedi cael ei lusgo o dan y fan, gyda'r parsel wedi ei ddal yn ffenest flaen y cerbyd.

Cafodd y cerbyd ei yrru ar Ffordd y Gogledd tuag at ganol y ddinas dros bellter o 800 llath (740m).

Pan ddaeth y cerbyd i stop, dywedwyd bod "Mr Lang o dan y fan, yn gaeth a ddim yn anadlu gydag anafiadau niferus".

Clywodd y llys bod gan Mr Lang anafiadau i'w ymennydd a nifer o anafiadau i'w gorff.

Fe nododd Mr Elgifari y byddai'n pledio'n ddieuog i'r cyhuddiad o geisio llofruddio.