´óÏó´«Ã½

Mae Cymru allan o Gwpan Rygbi'r Byd wedi iddyn nhw gael eu trechu o 17-29 gan Ariannin mewn gêm fratiog yn rownd yr wyth olaf ym Marseille.

Er i Gymru reoli'r hanner cyntaf, doedd y Pumas fyth ymhell ar ei hôl hi, a nhw aeth ymlaen i reoli'r ail hanner.

Daeth y ceisiau i Gymru gan Dan Biggar a Tomos Williams, tra bod Joel Sclavi a Nicolás Sánchez wedi croesi i'r Archentwyr.

Tîm Michael Cheika felly fydd yn herio Seland Newydd yn y rownd gynderfynol ym Mharis nos Wener, wedi iddyn nhw drechu Iwerddon nos Sadwrn.

Wedi i Emiliano Boffelli fethu gyda chic gosb gynnar, i Gymru ddaeth y pwyntiau cyntaf, gyda gwaith da gan George North a Gareth Davies yn arwain at gais i Dan Biggar dan y pyst.

Llwyddodd Biggar i drosi ei gais ei hun, cyn i ddigwyddiad anarferol weld y dyfarnwr Jaco Peyper o Dde Affrica yn gorfod gadael y maes oherwydd anaf, gyda Karl Dickson o Loegr yn cymryd ei le.

Ychwanegodd Biggar dri phwynt gyda gôl gosb, ac er iddo fethu gyda chic gosb arall, roedd Cymru'n edrych yn ddigon cyfforddus gyda mantais o 10-0.

Ond daeth pwyntiau cyntaf y Pumas yn fuan cyn hanner amser, gyda Boffelli yn llwyddo gyda dwy gôl gosb sydyn yn ystod diweddglo tanllyd i'r hanner cyntaf i'w gwneud hi'n 10-6 i Gymru ar yr egwyl.

Gyda Chymru wedi rheoli'r hanner cyntaf oni bai am y munudau olaf, fe fyddai Warren Gatland wedi bod yn siomedig i fod â mantais o bedwar pwynt yn unig ar yr hanner.

Sgoriodd Boffelli gôl gosb arall ar ddechrau'r ail hanner i ddod ag Ariannin o fewn pwynt, cyn ychwanegu tri phwynt arall i'w rhoi ar y blaen am y tro cyntaf.

Roedd diffyg disgyblaeth Cymru yn bryder, a'r Archentwyr yn ddigon hapus i chwarae gêm fratiog.

Ond ar ôl 57 munud daeth ail gais i Gymru, wrth i'r mewnwr Tomos Williams - a ddaeth ymlaen yn gynnar yn yr ail hanner - weld bwlch yn amddiffyn Ariannin er mwyn sgorio dan y pyst.

Yn fuan wedi hynny roedd Cymru'n credu y dylai'r clo Guido Petti fod wedi gweld cerdyn am ergyd i ben Nick Tompkins, ond roedd Karl Dickson o'r farn nad oedd hi hyd yn oed yn drosedd.

O fewn munudau sgoriodd Ariannin eu cais cyntaf trwy'r prop Joel Sclavi, ac fe roddodd drosiad Boffelli fantais o 17-19 i Los Pumas.

Gyda phum munud yn weddill daeth Louis Rees-Zammit yn agos at sgorio wedi i Rio Dyer dorri trwy'r amddiffyn, ond fe wnaeth Ariannin ddigon o drwch blewyn i'w atal ger y llinell gais.

Er mai Cymru fu'n pwyso yn y cyfnod wedi hynny, gydag ychydig funudau'n weddill fe wnaeth Nicolás Sánchez ryng-gipio pas gan Sam Costelow er mwyn sgorio cais hawdd a rhoi'r Pumas tu hwnt i afael Cymru.

Sgoriodd Sánchez gôl gosb gyda chic ola'r gêm er mwyn selio'r fuddugoliaeth, a sicrhau mai Ariannin fydd yn gwneud y daith i Baris y penwythnos nesaf.

Wedi'r canlyniad, mynnodd Warren Gatland ei fod eisiau parhau fel prif hyfforddwr y garfan genedlaethol.

Mae ganddo gytundeb pum mlynedd gydag Undeb Rygbi Cymru - fyddai'n ei gymryd hyd at Gwpan y Byd 2027 - ond mae cymal ynddo sy'n golygu bod modd ei dorri'n fyr ar ôl y bencampwriaeth eleni.

Dywedodd Gatland, 60, y byddai gan yr undeb "berffaith hawl" i ddod â'i gytundeb i ben yn dilyn y siom o golli yn y chwarteri.

Ond ychwanegodd: "Rydw i eisiau cymryd y grŵp yma ymhellach."