´óÏó´«Ã½

Roedd yn "gamgymeriad" fod gan Gymru, yr Alban a Gogledd Iwerddon eu negeseuon eu hunain ar Covid, mae Boris Johnson wedi dweud wrth yr ymchwiliad i'r pandemig.

Dywedodd y cyn-brif weinidog ei bod hi'n "hawl naturiol a phriodol" i lywodraethau'r tair gwlad gael eu hymagwedd eu hunain.

Ond dywedodd fod hynny'n golygu negeseuon gwahanol yn dod o'r gwahanol genhedloedd.

"Hoffwn dynnu sylw at y ffaith ein bod ni'n dibynnu'n fawr ar negeseuon i reoli'r feirws," meddai.

"Un broblem oedd gyda ni, oherwydd hawl naturiol a phriodol y gweinyddiaethau datganoledig i gael eu hymagwedd eu hunain, oedd y gallai newyddion y ´óÏó´«Ã½ weithiau gael un neges o Rif 10, ac yna un ychydig yn wahanol i'r Alban neu ble bynnag.

"Dwi'n meddwl bod angen i ni gael trefn ar hynny yn y dyfodol."

Cyhuddodd Boris Johnson y llywodraethau datganoledig hefyd o ollwng gwybodaeth o gyfarfodydd brys COBRA yn ystod y pandemig.

Dywedodd wrth yr ymchwiliad fod hynny "weithiau" yn digwydd a bod hynny "yn fy marn i yn broblem."

Cyn y gwrandawiad, galwodd teuluoedd Cymreig a gollodd anwyliaid i Covid am "barcio" gwahaniaethau gwleidyddol er mwyn amddiffyn pawb yn y DU yn ystod y pandemig nesaf.

Dechreuodd Mr Johnson y gwrandawiad ddydd Mercher trwy ymddiheuro am y "boen a'r golled a'r dioddefaint" yn ystod y pandemig.

Cadarnhaodd nad oedd tua 5,000 o'i negeseuon WhatsApp rhwng 30 Ionawr a Mehefin 2020 ar gael oherwydd problemau technegol gyda ffôn symudol.

Dywedodd ei fod am wneud yn glir nad oedd ef wedi cael gwared ar unrhyw negeseuon WhatsApp.

Mae cyn-ysgrifennydd iechyd Llywodraeth y DU, Matt Hancock, eisoes wedi dweud wrth yr ymchwiliad y dylai pwerau orwedd gyda gweinidogion y DU ac nid rhai Cymru.

Fe wnaeth Prif Weinidog Cymru, Mark Drakeford, wrthod sylwadau Mr Hancock.

Dywedodd Mr Drakeford nad yw'r ymchwiliad wedi bod yn hysbyseb dda am roi mwy o bwerau i Lywodraeth y DU.

Er i Boris Johnson gychwyn y cyfnod clo cyntaf ledled y DU, roedd natur y ddeddfwriaeth iechyd cyhoeddus yn golygu bod Cymru, Yr Alban a Gogledd Iwerddon wedyn yn gyfrifol am greu eu rheolau Covid eu hunain, gyda Llywodraeth y DU yn penderfynu dros Loegr.

Dwedodd Michael Gove, gweinidog Llywodraeth y DU sy'n gyfrifol am gydlynu â'r llywodraethau datganoledig, ei fod hefyd o blaid cael un polisi ledled DU yn ystod ei ymddangosiad o flaen yr ymchwiliad yr wythnos ddiwethaf.