´óÏó´«Ã½

Mae menyw a gafodd strôc pan oedd ond yn 29 oed yn galw am fwy o gefnogaeth iechyd meddwl yn dilyn y salwch.

Dywedodd Melissa Broad ei bod yn "poeni y bydd pobl yn gallu bennu lan mewn lle tywyll iawn" heb gefnogaeth ddigonol.

Yn ôl elusen Mind a'r Gymdeithas Strôc, dim ond 3% o'r rheiny sy'n derbyn cymorth iechyd meddwl yn dilyn cael strôc.

Mae Llywodraeth Cymru yn dweud eu bod yn cydweithio â'r Gymdeithas Strôc i helpu pobl wella yn dilyn y salwch.

Fe brofodd Melissa Broad, o bentref Creigiau ger Caerdydd, strôc pan oedd yn 29 oed, a hynny yn gwbl annisgwyl.

Dair wythnos cyn hynny roedd hi wedi rhoi genedigaeth i'w phlentyn cyntaf.

Wedi iddi brofi poenau ofnadwy yn ei phen, dywedodd y meddyg mai meigryn oedd arni, ond 10 awr yn ddiweddarach nid oedd yn gallu siarad yn iawn. Oriau'n ddiweddarach ac nid oedd yn gallu siarad o gwbl.

Fe alwodd ei gŵr, Paul am ambiwlans, ac ar ôl cyrraedd yr ysbyty fe ddywedodd y meddyg wrthi ei bod hi wedi cael strôc.

Roedd yr effaith corfforol yn ddifrifol, gyda Melissa yn methu siarad, ysgrifennu na darllen ar ôl gadael yr ysbyty.

Fe gafodd y strôc effaith ar ei hiechyd meddwl yn ogystal â'r effeithiau corfforol.

Dywedodd: "Yn yr ysbyty fe wnaethon nhw gynghori fi i beidio â chael mwy o blant oherwydd y risg, a dweud mwy na thebyg bydde ni byth yn gweithio eto."

"Fe nes i ddechrau meddwl be' oedd o 'mlaen i a siwd oedd fy mywyd i mynd i weithio mas.

"Roedd e'n teimlo 'chydig bach fel bod fy mywyd i drosodd. Fe wnaeth hynna i gyd gael effaith enfawr ar fy iechyd meddwl i ac roeddwn i mewn lle tywyll iawn."

Mae Melissa yn galw am ragor o gefnogaeth i bobl sydd wedi cael strôc ac yn profi problemau iechyd meddwl.

Dywedodd nad oedd "neb 'di cynnig unrhyw gymorth i fi, a bu'n rhaid i fi edrych am gymorth a help ar-lein, ond achos bo' fi ffili darllen yn dda roedd e'n anodd iawn."

Mewn adroddiad ar y cyd mae Mind Cymru a'r Gymdeithas strôc yn pwysleisio nad yw profiad Melissa yn un anghyffredin.

Maen nhw'n dweud fod 70,000 o bobl yng Nghymru wedi cael strôc, a bod tri chwarter o'r rheiny wedi profi o leiaf un broblem iechyd meddwl ers y salwch.

Maen nhw hefyd yn dweud mai ond 3% sydd wedi cael cefnogaeth pan fod yr angen fwyaf arnyn nhw.

Yn dilyn ei phrofiad hi, mae Melissa o'r farn bod lle i wella o ran yr help a'r gefnogaeth sydd ar gael.

Dywedodd iddi fod yn "ffodus, roedd gyda fi deulu cefnogol o 'nghwmpas i ac roedd gyda fi fabi newydd a bues i yn canu a darllen iddo fe er mwyn cael fy hunan mewn lle gwell.

"Ond os nad yw'r gefnogaeth yna gen ti, rwy'n ofni y bydd pobl yn gallu bennu lan mewn lle tywyll iawn."

Dywedodd llefarydd ar ran Llywodraeth Cymru mai "byrddau ac ymddiriedolaethau iechyd sy'n gyfrifol am gynllunio a chyflwyno gwasanaethau strôc", ond bod y llywodraeth yn cydweithio â'r Gymdeithas Strôc i helpu pobl i wella ar ôl strôc ac "mae hyn yn cynnwys gwella mynediad i wasanaethau cefnogi".