´óÏó´«Ã½

Mae dyn ifanc o Gaerdydd sydd â dwy swydd er mwyn bod mewn sefyllfa i brynu tŷ yn dweud bod ei freuddwyd yn teimlo ymhell i ffwrdd.

Mae Jordan Edwards, 21, yn gweithio mewn ysgol yn ystod y dydd ac mewn canolfan ieuenctid dair noson yr wythnos.

Ond ar ôl talu rhent a biliau, mae'n dweud bod arbed arian i brynu tŷ yn anodd.

"Rwy'n teimlo fy mod yn gwneud popeth o fewn fy ngallu," meddai, "ond nid yw'r swm sy'n rhaid i chi ei wario o'i gymharu â'r hyn rydych chi'n ei wneud yn helpu mewn gwirionedd."

Fe wnaeth Banc Lloegr gyhoeddi ddydd Iau y bydd cyfraddau llog yn aros ar 5.25% fel cyfradd sylfaenol, ac mae hynny wedi gwthio cost morgeisi i fyny.

Mae Jordan yn credu y bydd yn gallu fforddio i brynu tÅ· un diwrnod, ond bydd yn cymryd amser hir.

"Fi ddim yn gwybod sut mae unrhyw un yn disgwyl i bobl oedran ni geisio cael tÅ· neu forgais o fewn cyfnod realistig o amser," meddai.

Mae Jordan yn rhentu gyda chyd-letywr i gadw costau i lawr ond "mae'n dal i fod yn frwydr", ychwanegodd.

"Mae llawer o fy ffrindiau yn dal i fyw gartref achos maen nhw methu fforddio i symud allan i rentu oherwydd fod e mor ddrud."

Fe awgrymodd ffigyrau chwyddiant ddydd Mercher bod costau byw'n parhau i ostwng.

Mae chwyddiant yn mesur y gyfradd y mae prisiau'n codi ac yn y flwyddyn hyd at Chwefror roedd yn 3.4%.

Roedd hyn yn gwymp mwy na'r disgwyl o'i gymharu â ffigwr mis Ionawr o 4%.

Mae cyfraddau llog yn amlygu faint mae'n ei gostio i fenthyg arian, ac mae Banc Lloegr yn defnyddio cyfraddau llog i geisio dod â chwyddiant i lawr i'w darged o 2%.

Mae cyfraddau llog uwch yn gwneud benthyca, gan gynnwys morgeisi, yn ddrutach.

Fe ddaeth cytundeb morgais Samantha James, 36, o Bont-iets i ben ym mis Ionawr. Mae hi bellach ar gytundeb cyfradd newidiol.

"Fi 'di dewis mynd ar rât sydd yn mynd lan a lawr, a fi mynd i adael e fel 'na nawr nes diwedd yr haf i weld be sy'n digwydd," dywedodd.

"Gobeithio bydd e'n dod lawr ond mae fe'n risg yn amlwg achos gallai fe fynd lan.

"Fi'n sefyllfa eitha' lwcus - o'n i ar y gytundeb blaenorol am 15 mlynedd. Roedd e ddim yn ormod, ond nawr mae wedi mynd lan £100.

"Ni'n lwcus achos ni'n gallu fforddio fe am nawr, ac mae'n rhoi amser i ni weld be sy'n mynd i ddigwydd gyda'r farchnad yn hwyrach yn y flwyddyn.

"Mae rhaid i ni fod yn fwy gofalus gyda arian, yn bendant. Mae popeth yn mynd lan felly mae yn anodd.

"Ni'n lwcus bod bach o arian sbâr gyda ni ar hyn o bryd, ond dydyn ni ddim eisiau bod ar variable rate yn hirach na'r haf."

Roedd hi'n gyfnod heriol pan ddaeth hi'n amser i edrych am forgais newydd, medd Samantha.

"O'n i yn poeni achos tuag at ddiwedd blwyddyn diwethaf, roedd llythyron yn dod trwyddo a o'n i'n gallu gweld faint oedd e mynd i fynd lan a oedd e lot mwy na £100 pryd hynny.

"Ond o'n i'n lwcus achos erbyn Ionawr wnaeth y radd ddechrau cwympo tamed bach."

Yn ôl y cynghorydd morgeisi, Rhys Young, mae mwy o bobl yn edrych am gymorth annibynnol ers i gyfraddau llog codi.

"O fewn y flwyddyn ddiwethaf, mae mwy o bobl eisiau cymorth," dywedodd.

"Pryd oedd y cyfraddau yn tua 1% neu 2% roedd pobol yn hapus i gymryd manylion o'r banciau. Ond gyda'r cyfraddau mwy uchel o 5%-6% mae pobol eisiau darlun o'r farchnad gyfan a'r math o opsiynau sydd mas yna.

"Os bydd chwyddiant yn cario ymlaen i ddod lawr yn ystod y misoedd nesaf, gobeithio bydd cyfraddau llog yn dechrau dod lawr hefyd, ond am nawr ni'n disgwyl i weld a fyddan nhw'n aros ar yr un radd.

"Beth ni 'di sylweddoli dros y misoedd diwethaf yw os mae rhywun yn gallu fforddio tŷ am £200,000 mae'r taliadau mor uchel maen nhw ddim eisiau prynu'r tŷ yna.

"Felly yn lle prynu tŷ am £200,000, mae nhw'n prynu un £160,000 i gael safon da o fywyd hefyd."