´óÏó´«Ã½

Mae'n ymddangos fod pethau'n gwella erbyn hyn, gyda'r rhybudd melyn am eira a rhew gan y Swyddfa Dywydd wedi dod i ben o fewn yr hanner awr ddiwethaf.

I arbed gwaith sgrolio i chi, dyma'r prif benawdau:

• Dros 40 o ysgolion ar gau ar hyd a lled y wlad ar ôl eira dros nos;
• Siroedd gorllewinol - yn enwedig Gwynedd, Ceredigion a Sir Benfro - sydd wedi'u heffeithio waethaf;
• Nos Fercher oedd y noson oeraf o'r gaeaf hyd yn hyn - cofnodwyd -9.1C ym Mhowys.

Yn y cyfamser, mae'r gwasanaethau brys yn parhau i rybuddio pobl i gymryd gofal, yn enwedig gyrwyr.

Ond dyna'r oll gan dîm llif byw Cymru Fyw am heddiw - diolch o galon i chi am ddilyn a chymerwch ofal yn y tywydd oer.

Ffynhonnell y llun, Ani-Caul/´óÏó´«Ã½ Weather Watchers

Mae Ysgol y Garnedd, Penrhosgarnedd yn agored heddiw ac mae'r disgyblion yn ac yn cael hwyl ar yr iard!

Ffynhonnell y llun, Ysgol y Garnedd

Mae rhybudd melyn y Swyddfa Dywydd newydd ddod i ben, ond mae hi'n dal yn oer iawn ar draws y wlad.

Y newyddion da i'r rhai sy'n casáu rhew ac eira yw bod tywydd llai gaeafol i ddod dros y penwythnos, ond fe fydd y gwynt a'r glaw yn eu holau wrth i'r tymheredd godi.

Mae hi'n eithriadol o rewllyd yn ardal Bridell, gogledd Sir Benfro'r bore 'ma ac mae'r lonydd llithrig yn creu trafferth i yrwyr.

Ein gohebydd Carwyn Jones sy'n rhoi blas o'r sefyllfa y bore 'ma yng Ngwynedd.

Fel arfer mae Dani Robertson yn tynnu lluniau o'r awyr dywyll.

Ond yr olygfa braf ben bore oedd yn mynd â'i .

Ffynhonnell y llun, Dani Robertson

Tractor yn tynnu car oedd wedi mynd i drafferth ar yr eira ar yr A487 rhwng Crymych ac Aberteifi yn Sir Benfro - mae'n siŵr bod yna ryddhad o'i weld yn cyrraedd.

Prifysgol Bangor

Mae Prifysgol Bangor yn enwog am fod y Coleg Ar Y Bryn.

Ond mae trwch o eira yn croesawu'r myfyrwyr ar y bryn heddiw!

Ffynhonnell y llun, Prifysgol Bangor

Traffig Cymru

Mae Traffig Cymru wedi rhyddhau rhestr o gynghorion i yrwyr sut i yrru'n ddiogel mewn amodau rhewllyd.

Cofiwch fynd â'r offer angenrheidiol gyda chi yn y car - cliciwch isod i ddarllen mwy.

Aled Scourfield
Gohebydd ´óÏó´«Ã½ Cymru

Mae'r gorllewin yn gweld rhai o'r amodau gwaethaf y bore 'ma wedi i'r eira syrthio dros nos, fel y mae Aled Scourfield yn egluro.

Heddlu Gogledd Cymru

Yn yr ardaloedd gwledig y mae angen pwyllo fwyaf y bore 'ma os oes rhaid mentro allan, yn ôl Heddlu'r Gogledd, er bod yr amodau'n gur pen i yrwyr a cherddwyr ar draws y rhanbarth.

Maen nhw'n atgoffa gyrwyr o bwysigrwydd gadw pellter diogel, gan bod hi'n cymryd hyd at 10 gwaith yn hirach i gerbyd ddod i stop mewn rhew ac eira.

Aled Scourfield
Gohebydd ´óÏó´«Ã½ Cymru

Mae hi’n amlwg bod y "Pembrokeshire Dangler" wedi gweithio ei hud dros nos, gan adael mantell wen dros rannau helaeth o Sir Benfro a De Ceredigion.

Mae'r ffyrdd gwledig, fel y rhai yma ym mhentref Mynachlog-ddu, wedi eu gorchuddio ag eira o hyd, ac mae 'na drwch go lew o rhyw 5cm. Dim ond cerbydau 4x4 a cheir rali rwy' wedi gweld hyd yn hyn y bore 'ma!

Mae'r problemau mwyaf wedi bod ar y briffordd rhwng Arberth ac Aberteifi, yr A478. Mae yna nifer o geir a lorïau wedi mynd yn sownd yn yr eira.

Doedd traffig ddim yn symud ym Mridell am gyfnod oherwydd y trafferthion. Mae criw tân Crymych wedi bod yn cynorthwyo i roi graean ar y ffordd yn y pentref mae'n debyg. Mae'r eira wedi cael effaith fawr ar ysgolion gydag o leiaf 13 ar gau yn Sir Benfro hyd yma.

Tywydd

Neithiwr oedd noson oeraf Cymru o'r gaeaf hyd yn hyn.

Cafodd tymheredd dros dro o -9.1 C ei gofnodi ym mhentref Tirabad ger Pontsenni ym Mhowys.

Yr olygfa ar y Maes yng Nghaernarfon ger y cerflun o'r Dewin Cymreig

Ar hyn o bryd, mae dros 40 o ysgolion yng Nghymru ar gau o achos y tywydd.

Mae'r rhan fwyaf o'r rheiny yn siroedd Gwynedd a Phenfro.

Mae'n amlwg mai ardaloedd gorllewinol sydd wedi'u heffeithio waethaf gan y tywydd heddiw.

Cyngor Ceredigion

Mae Cyngor Sir Ceredigion wedi datgan fod o leiaf saith ysgol - yn gymysgedd o rai cynradd ac uwchradd - wedi cau oherwydd y tywydd.

Roedd eira cyntaf y flwyddyn wedi disgyn yn gynharach yn yr wythnos a hynny ar dir isel mewn ambell i ardal yng Nghymru, yn enwedig yn y gogledd-ddwyrain.

Dyma rai o'r golygfeydd gaeafol dros y dyddiau diwethaf.

Ffynhonnell y llun, Paulo/´óÏó´«Ã½ Weather Watchers

Daeth rhybudd melyn y Swyddfa Dywydd am eira a rhew i rym am 22:00 nos Fercher ac fe fydd yn para tan 11:00 ddydd Iau.

Mae'n effeithio ar chwe sir y gogledd, Ceredigion a Phowys, a siroedd Penfro, Caerfyrddin ac Abertawe.

Mae yna rybudd y bydd yr amodau i deithwyr yn anodd.

Ffynhonnell y llun, Swyddfa Dywydd

Cyngor Sir Penfro

Mae Cyngor Sir Penfro wedi cadarnhau bydd rhai ysgolion ar gau yn y sir heddiw.

Ffynhonnell y llun, Scarlet Rose/´óÏó´«Ã½ Weather Watchers

Traffig Cymru

Mae'r tywydd gwael yn achosi oedi ar Bont Britannia wrth i bobl geisio croesi i gyrraedd y tir mawr y bore 'ma.

Mae Traffig Cymru yn cynghori pobl i ganiatáu amser ychwanegol i deithio.

Ffynhonnell y llun, Traffig Cymru