Dau ddaeargryn wedi taro'r canolbarth fore Llun

Disgrifiad o'r llun, Roedd canolbwynt y daeargryn cyntaf ger Llangurig, a'r ail i'r gogledd o Dregaron

Mae Arolwg Daearegol Prydain wedi cadarnhau bod y canolbarth wedi cael ei ysgwyd gan ddau ddaeargryn bychan fore dydd Llun.

Fe ddigwyddodd y cyntaf am 08:37, ar ddyfnder o 7km, gyda'r canolbwynt ychydig filltiroedd i'r gorllewin o Langurig, yn agos at y ffin rhwng Powys a Cheredigion.

Cafodd ei gryfder ei fesur fel 1.0 (magnitude).

Hanner awr yn ddiweddarach cofnodwyd daeargryn oedd yn mesur 2.3 i'r gogledd o Dregaron yng Ngheredigion, gyda'r canolbwynt yng Nghors Caron, ar ddyfnder o 2km.

Ym mis Chwefror 2023, cafodd daeargryn yn mesur 3.7 ei gofnodi yn ne Powys.

Dyna oedd y daeargryn mwyaf i daro Cymru ers 2018 pan darodd ddaeargryn yn mesur 4.6 ger Abertawe.