´óÏó´«Ã½

Mae ffermwr o Geredigion wedi cael dirwy am gyfres o droseddau yn ymwneud â chadw a symud gwartheg.

Bydd yn rhaid i Gary Davies o fferm Bercoed Uchaf ym Mangor Teifi ger Llandysul dalu dros £6,000 mewn dirwyon a chostau wedi iddo bleidio'n euog i wyth o gyhuddiadau yn Llys Ynadon Aberystwyth.

Clywodd yr achos bod Davies wedi methu'n gyson â rhoi gwybod am farwolaethau a symudiadau gwartheg ers 2021, na dilyn y mesurau gofynnol i atal clefydau rhag lledu ymysg gwartheg.

Fe gyfaddefodd hefyd ei fod wedi symud 99 o wartheg ar ac oddi ar ei fferm er gwaethaf cyfyngiadau rhag y diciâu.

'Dim dewis ond dwyn achos'

Fe gafodd yr achos ei ddwyn gan adran Diogelu'r Cyhoedd Cyngor Sir Ceredigion.

Roedd swyddogion, medd llefarydd, wedi ymweld â Davies ac ysgrifennu ato "sawl gwaith ers 2020 yn nodi achosion o dorri deddfwriaeth a rhoi cyngor ar y gofynion cyfreithiol".

Dywedodd llefarydd bod hi'n "siomedig" na gymerodd Davies sylw o'r cyngor a gafodd gan y swyddogion, oedd yn "golygu nad oedd gan yr Awdurdod lawer o ddewis ond dod â'r achos hwn i'r llys".

Mae'r cyngor yn pwysleisio bod "cynnal a chadw symudiadau anifeiliaid yn gywir yn hanfodol i reoli clefydau anifeiliaid, ac uniondeb y gadwyn fwyd".

Fe gafodd Davies ddirwyon o £2,200 am dorri rheoliadau adnabod gwartheg, gorchmynion rheoli clefydau, a gorchmynion TB.

Mae hefyd yn gorfod talu cost ychwanegol o £880, ynghyd â £3011.59 i'r cyngor sir am gostau dod â'r mater i'r llys, gan wneud cyfanswm yn £6091.59.