´óÏó´«Ã½

Fe wnaeth Cymru frwydro i gael gêm gyfartal yn erbyn Twrci yng Nghynghrair y Cenhedloedd nos Sadwrn.

Dyma oedd pumed gêm Craig Bellamy wrth y llyw a nid yw Cymru wedi colli ers iddo gymryd yr awennau.

Roedd pedwar newid i'r tîm a ddechreuodd yn erbyn Montenegro fis diwethaf gyda Kieffer Moore, Wes Burns a'r amddiffynnwr Owen Beck i gyd wedi’u hanafu.

Mae'r canlyniad yn golygu bod Cymru yn parhau yn yr ail safle yng ngrŵp 4 yn ail haen Cynghrair y Cenhedloedd,

Roedd yr hanner cyntaf yn llawn cyffro gyda chefnogaeth i'r tîm cartref yn atseinio'n gryf o un pen y cae i'r llall.

Er i Gymru gael sawl cyfnod ar y droed flaen i roi Twrci dan bwysau, y tîm cartref oedd yn rheoli'r meddiant gyda sawl cyfle addawol at y gôl.

Cafodd Twrci 11 ymdrech at y gôl yn ystod yr hanner cyntaf, o'i gymharu a dim ond un gan y Cymry.

Daeth cyfle mwyaf addawol y tîm cartref gyda rediad cyflym yr ymosodwr Ynus Akgun ond llwyddodd Karl Darlow i atal y bêl rhag croesi'r llinell.

Roedd saib yn y gêm ym munudau olaf yr hanner cyntaf wrth i Joe Rodon a Mark Harris dderbyn triniaeth ar y cae ar ôl taro eu pennau yn erbyn ei gilydd.

Wedi i'r gêm ail-ddechrau daeth eiliad o obaith i'r Cymry.

Fe wnaeth Harry Wilson gymryd cyfle gyda'i droed chwith ond tarodd y bêl yn erbyn y postyn mewn ymdrech agos iawn.

Yn dilyn hanner cyntaf llawn cyffro di-sgôr oedd hi ar yr egwyl.

Cafodd Cymru ddechrau mwy cyfforddus i'r ail hanner. Daeth Daniel James ymlaen i gymryd lle Mark Harris a dangosodd ei gyflymder wrth ymyl Sorba Thomas a Brennan Johnson.

Gyda'r dorf yn parhau i ysgogi'r tîm cartref, dechreuodd Cymru i golli'r bêl yn aml yng nghanol y cae.

Fe ildiodd Sorba Thomas gic rydd am gyffwrdd a'r bêl gyda'i law ond roedd ergyd Orkun Kokcu yn rhy llydan i roi Twrci ar y blaen.

Yr un oedd canlyniad y ddau gyfle nesaf - teithiodd y bêl yn llydan heibio'r gôl.

Daeth ergyd i Gymru wrth i Joe Rodon dderbyn garden felen ac ildio cic o'r smotyn i'r tîm cartref - tarodd y bêl y postyn unwaith eto.

Bydd Cymru yn croesawu Gwlad yr Iâ i Gaerdydd ddydd Mawrth.