����ý

Nod un ferch ifanc o Wynedd dros y blynyddoedd nesaf yw sicrhau ei lle yn nhîm Prydain ar gyfer y Gemau Olympaidd.

Mae Glain Watkin Jones, 21 oed o'r Felinheli, newydd gynrychioli tîm Prydain am y tro cyntaf mewn cystadleuaeth marchogaeth a neidio ceffylau yn y Weriniaeth Tsiec.

Fe wnaethon nhw orffen yn ail yn y gystadleuaeth tîm ac fe ddaeth Glain yn bedwerydd yng nghystadleuaeth unigol y Grand Prix.

Mae Gemau Olympaidd Paris - sy'n cychwyn ddiwedd y mis - wedi dod yn rhy gynnar yng ngyrfa Glain, ond mae hi'n gobeithio gallu cystadlu am fedal pan fydd y gemau yn Los Angeles yn 2028.

“Fi a mam oedd yna pan wnaethon ni ffeindio allan fy mod i 'di cael lle ar y tîm," meddai Glain.

"'Naeth y ddwy ohonom ni just crio. Mae’n rhywbeth dwi ‘di gweithio mor galed amdano fo."

Roedd Glain wedi cystadlu yn Ewrop sawl tro o'r blaen, ond erioed fel rhan o dîm Prydain.

Profiad 'emosiynol'

“O’n i’n nerfus iawn i ddechrau achos o’n i am ddangos fy mod i’n gallu bod ar y lefel yna ac yn haeddu bod yna.

“Ond ar ôl gorffen y rownd gyntaf nes i just rili ffocysu ac ymlacio a dechrau mwynhau’r peth.

“Dwi’n teimlo nes i ddangos bo' fi’n ddigon da i fod yna ac wedi gweithio’n galed i fod yna.

“Odd o’n brofiad anhygoel a jyst hollol emosiynol.”

Dechreuodd Glain farchogaeth pan oedd hi'n blentyn oherwydd diddordeb ei mam, Iona Watkin Jones, mewn ceffylau.

“Dwi 'di bod yn reidio ers dwi’n gallu cofio," meddai Glain.

"Dechreuodd o gyda poni bach ac mae o 'di datblygu o hynny.

“Mae hi wedi bod yn daith hir ers hynny i geisio cyrraedd lle 'da ni heddiw.

“‘Da ni’n reidio chwech neu saith gwaith yr wythnos ac mae gyda ni ddeg o geffylau yma sydd angen cael eu reidio pob dydd.

"Mae o wir yn waith caled.”

Mae’r teulu newydd orffen adeiladu cyfleusterau marchogaeth newydd ar eu tir er mwyn galluogi i Glain, a’i brawd bach Dafydd, i ymarfer yn gyson.

Ond maen nhw hefyd am roi cyfle i grwpiau o’r ardal gael dysgu marchogaeth.

Dywedodd Iona: “O'dd o’n emosiynol iawn pan ddaeth yr e-bost yn dweud bod Glain ar dîm GB.

“Roedden ni'n fod i gadw’r newyddion yn reit ddistaw am ryw bythefnos ac roedd hynny’n anodd iawn, er ma' rhaid i mi gyfaddef, nes i ddweud wrth dipyn o ffrindiau agos.

“O'dd o’n wych, ac mae’n wych i’r ardal yma, ac i Gymru hefyd, cael merch leol ar y tîm.”

Ychwanegodd: “Mae ‘na dipyn o grwpiau wedi dechrau dod yma i ddysgu marchogaeth ceffylau, ac mae Glain wedi dechrau gwneud tipyn o hyfforddi hefyd.

"Mae’n gyfle da i hybu’r genhedlaeth nesa o farchogion.”

Mae brawd Glain, Dafydd, 17, hefyd yn marchogaeth a'i nod yw dilyn olion troed ei chwaer.

“Mae’n anhygoel bod Glain wedi cyrraedd tîm GB. Nes i ddechrau reidio gan bo' hi’n gwneud yn barod," meddai.

"Dwi’n gobeithio gallu cyrraedd y tîm blwyddyn nesaf.”

Gyda'r Gemau Olympaidd ym Mharis ar y gorwel mae Glain yn edrych ymlaen at gefnogi tîm marchogaeth Prydain o bell.

Ond gobaith mawr Glain yw bod yn rhan o'r tîm yn y dyfodol.

“'Swn i wrth fy modd yn mynd i’r Gemau Olympaidd.

"Mae gen i lawer o bethau llai dwi am eu cyflawni cyn hynny hefyd, ond y Gemau Olympaidd yw’r prif nod.”