´óÏó´«Ã½

Mae rhai o gricedwyr y gogledd yn siomedig wrth i'r glaw diweddar gael effaith mawr ar eu paratoadau ar gyfer y tymor.

Fel yn flynyddol, roedd y clybiau yn paratoi i gychwyn eu tymor o chwarae ar 20 Ebrill.

Ond mae glaw trwm dros gyfnod o sawl wythnos wedi amharu ar y gwaith o baratoi'r meysydd, gan achosi sefyllfa "digynsail" yn ôl swyddogion.

Mae Cynghrair Criced Gogledd Cymru, sydd â phum adran, wedi penderfynu gohirio cychwyn y tymor tan 4 Mai.

Eu gobaith yw y bydd pythefnos ychwanegol yn galluogi'r clybiau i gael eu peiriannau ar y meysydd i gyflawni'r gwaith angenrheidiol.

Ond gyda chriced ymysg y campau sydd fwyaf dibynnol ar dywydd ffafriol, mae pryder hefyd y bydd hwn yn batrwm mwy cyson dros y blynyddoedd i ddod.

Yn ôl y Swyddfa Dywydd roedd 53% yn fwy o law fis diwethaf o'i gymharu â'r mis Mawrth arferol yng Nghymru.

Mae'r sgil effeithiau wedi bod yn amlwg ar glybiau criced llawr gwlad, sy'n aml yn ddibynnol ar wirfoddolwyr i edrych ar ôl y meysydd.

Yn ôl un o swyddogion Cynghrair Gogledd Cymru, mae'r tywydd diweddar wedi achosi "hafoc" gyda pharatoadau sawl clwb.

Dywedodd Dyfan Parry, Swyddog Cyfathrebu'r gynghrair: "'Da ni wedi cael lot o feedback gan y clybiau sydd yn bell tu ôl iddi ar y gwaith paratoi.

"Roedd rhai clybiau'n poeni fyddan nhw ddim mewn sefyllfa i chwarae gêm gartref tan ganol Mai hyd yn oed, mae'n unprecedented.

"Y glaw persistent yna, roedd un clwb yn dweud wythnos yn ôl y basan nhw'n barod ar gyfer 27 Ebrill ac wedyn maen nhw just wedi cael tri diwrnod o law a'r cae wedi floodio.

"Fel committee oeddan yn teimlo fod rhaid i ni helpu'r clybiau ond mae'n anodd gan fod rhai clybiau yn rhannu caeau gyda phêl-droed a rygbi, ond pythefnos ydi'r mwyaf allwn wneud i ddweud y gwir.

"Mae 'na rai pobl sydd wedi bod ar y committee am flynyddoedd ac maen nhw'n dweud dydyn nhw erioed wedi gweld unrhyw beth fel hyn o'r blaen."

Un o glybiau amlyca'r gogledd ydy Porthaethwy, sydd fwyaf adnabyddus am lansio gyrfa Matthew Maynard, a aeth ymlaen i chwarae dros Forgannwg a Lloegr mewn gyrfa lewyrchus.

Fel yr unig glwb gweithredol ar Ynys Môn erbyn hyn, roedden nhw'n gobeithio cynnal eu sesiwn gyntaf yn yr awyr agored nos Iau.

Ymysg y rheiny oedd chwaraewr gwadd o Dde Affrica.

Ond roedd canlyniad yr holl law yn golygu eu bod yn gorfod parhau i ymarfer o dan do yng nghanolfan hamdden y dref.

Dywedodd Dyfrig Jones, sy'n chwarae i'r clwb yn ogystal â bod yn gydlynydd y timau ieuenctid: "Yr effaith mwyaf yw bod y tir yn wlyb iawn.

"'Da ni wedi cael cyfnod digynsail o law fyswn i'n ei ddweud, sy'n golygu fod hi ddim yn hawdd i baratoi'r tir ar gyfer y tymor newydd.

"'Da ni'n lwcus iawn ym Mhorthaethwy fod ganddon ni'r adnodd gwych yma fan hyn, 'da ni wedi bod yn defnyddio hwn yn ystod y gaeaf hefyd ond rwy'n gwybod am nifer o glybiau sydd ddim mor lwcus."

Ar un cyfnod roedd hanner dwsin o glybiau criced ar Ynys Môn.

Er mai dim ond Porthaethwy sydd ar ôl, fe ychwanegodd fod y gamp mewn cyflwr iach a fod gan y clwb tua 130 o bobl ifanc yn chwarae ar draws y timau iau.

"Mae rhywun yn ymwybodol o effaith cynhesu byd eang a bod y tymhorau'n gallu newid, ond 'da ni wedi arfer gyda thywydd gwlyb ym mis Awst hefyd, yn anffodus 'da ni wedi arfer â hyn.

"Ond dwi ddim yn cofio dechrau tymor mor sal a'r hyn sydd wedi digwydd eleni."

Dywedodd cadeirydd y clwb, Robbie Jones: "Yr adeg yma flwyddyn dwytha' roedd y tywydd yn grêt yn doedd?

"Mae hi mor anodd darogan y pethau 'ma.

"Mae hi reit siomedig yn amlwg ond does ddim modd chwarae ar y funud.

"'Da ni yng nghanol cael cyfleuster rhwydi newydd, ond mae'r gwaith yna wedi gorfod dod i stop."

Dywedodd Jazmine Beauchamp, sy'n chwarae i'r clwb, fod gohirio cychwyn y tymor yn "siom mawr".

Ychwanegodd eu bod wedi gobeithio gallu ailddechrau chwarae yn yr awyr agored, ond estyn allan y rhwydi ar gyfer sesiwn arall o dan do oedd yr unig ddewis nos Iau.

"'Ni wedi bod yn ymarfer tu fewn dros y gaeaf ac wedi edrych ymlaen at y tymor a mae'n siom i orfod aros tu fewn am tamed bach mwy.

"Ni'n gobeithio bydd y tywydd yn clirio lan."

Gobaith Jazmine a sawl clwb arall, yw mai'r wicedi yn hytrach na'r glaw fydd yn syrthio dros yr haf.