´óÏó´«Ã½

Mae codwr pwysau o Ynys Môn yn anelu am fwy o fedalau, dim ond tair blynedd wedi iddo gymryd diddordeb yn y gamp.

Fis diwethaf fe wnaeth Lucas Williams ddychwelyd o Sun City yn Ne Affrica gyda dwy fedal aur ac un arian yng nghystadleuaeth y Commonwealth Classic.

Llwyddodd Lucas, sy'n 19 oed ac yn hanu o Gaergybi, hefyd i dorri record y Gymanwlad gyda deadlift o 313.5kg.

Mae ei fryd ar greu mwy o argraff yn y gamp, sy'n cael y gorau allan ohono, meddai.

Fe gychwynnodd Lucas godi pwysau yn 16 oed, yn wreiddiol fel modd i geisio gwella a chryfhau ei ben-glin yn dilyn anaf tra'n bocsio.

Mae'r cyn-ddisgybl Ysgol Uwchradd Bodedern yn hyfforddi ei hun mewn campfa yng Nghaergybi.

Dywedodd iddo ddechrau cymryd diddordeb mewn codi pwysau ar ddiwedd y cyfnod clo.

"Ro'n i wastad yn gwybod o'n i'n eitha' cryf pan yn blentyn," meddai.

"Ro'n i wedi gweld fideos powerlifting ar Instagram ac mae'n fwy accessible na weightlifting."

Gan gystadlu am y tro cyntaf yn 2022, mae wedi datblygu llawer mewn amser cymharol fyr, gan deithio i Rwmania y llynedd lle gipiodd fedal efydd ym mhencampwriaeth iau y byd.

Math o godi pwysau yw powerlifting, lle mai'r nod yw codi'r pwysau trwm mewn un symudiad.

Mae tair prif ddisgyblaeth sef sgwat, bench press a deadlift, ac mae cystadleuwyr yn cael tri chynnig i godi'r pwysau trymaf posib ym mhob un.

"Mae weightlifting Olympaidd yn llawer mwy technegol ac yn anoddach i ddysgu, mae'n gallu cymryd blynyddoedd," meddai Lucas.

"Mae powerlifting yn fwy dibynnol ar pa mor gryf wyt ti."

Gan ffilmio ei hun yn hyfforddi, mae Lucas yn parhau i ddysgu ei hun ac yn gorfod cyllido mynd i wahanol gystadlaethau ei hun.

"Dyma'r sport cynta' i fi ffeindio mod i'n rili da... fyswn i wrth fy modd bod y gorau," ychwanegodd.

Wedi gorfod codi tua £2,500 i gystadlu yn Ne Affrica ym mis Hydref, gan gynnwys apêl ar-lein, roedd hefyd angen iddo golli 4kg mewn pedwar diwrnod cyn y gystadleuaeth er mwyn cyrraedd y trothwy o 83kg.

Er hynny, llwyddodd i ennill cystadlaethau'r squat a'r deadlift, a daeth yn ail yn y bench press.

Mae cyfanswm pwysau’r tair disgyblaeth yn cael eu hychwanegu at ei gilydd er mwyn nodi sgôr terfynol, a Lucas oedd y gorau o'r holl gystadleuwyr yn ei adran.

Ond er ei lwyddiant, mae Lucas yn benderfynol o fynd yn bellach ac yn bwyta hyd at 4,500 o galorïau pob dydd er mwyn rhoi mwy o bwysau ymlaen i symud i adran drymach.

"Dwi eisiau gwneud lot mwy. Dwi byth yn hapus ac yn aimio i gael mwy a mwy bob amser," meddai.

"Mae mam fi over the moon a mae pobl wedi stopio fi yn y stryd yn dweud well done... mae'n deimlad da.

"Y targed nesa' ydy trio mynd fyny i 93kg. Dwi am drio cael cyntaf yn y four nations yn Glasgow a wedyn y British Champs.

"Dwi mor competitive a licio bod y gorau yn bob dim dwi'n gwneud."