����ý

Mae hi'n ddiwedd cyfnod yn Sir Benfro wrth i Keith Davies ymddeol wedi 59 mlynedd yn gyrru bysus yn yr ardal.

Ers 1965 mae Keith, sydd o bentref Glandwr ger Crymych, wedi cludo miloedd o bobl yng ngorllewin Cymru ac wedi dod i 'nabod yr ardal cystal â chefn ei law.

Yn siarad ar raglen Bore Cothi ar ����ý Radio Cymru, dywedodd Keith: "Mae’r plant cyntaf o’n i’n ei yrru i’r ysgol yn eu 70au heddi!

“Dwi ddim yn gwybod ble mae’r 59 mlynedd 'na wedi mynd, ond ma' nhw wedi pasio.”

Fe weithiodd Keith i wahanol gwmnïau yn y gorllewin dros y blynyddoedd cyn penderfynu ei bod hi'n amser rhoi'r gorau iddi, yn 84 oed.

“O’n i gyda chwmni Jones Login am 46 o flynydde, a fues i ym Maenclochog am saith mlynedd, ac yna gyda Midway nawr am chwe blynedd,” meddai Keith.

Mae Keith yn cofio ei fws cyntaf o ddechrau ei yrfa'n gyrru.

“O’n i’n dreifio half-cab, crash box iddi, ac o’n i’n dreifio hi am sawl blwyddyn lan i Ysgol Preseli.

“M���� half-cab yn golygu bod y gyrrwr lan yn y cab ben ei hunan.”

Yn siarad efo Shân Cothi dywed Keith bod disgyblu'r plant ar y bws ysgol erioed wedi bod yn broblem fawr: "Doedd dim fawr o angen disgyblu – mae parch mawr ‘di bod gen i at y plant dros y blynydde, ac os o’n i’n holi am unrhyw ffafr odd e i gael."

Er hyn, dywed Keith bod newidiadau wedi bod yn y diwydiant dros y blynyddoedd.

“M���� pethau 'di altro’n fawr, mae eisiau seat-belts ag ati, a sa i’n dweud bo’r plant yn ffrind iawn â'r rheiny.

“Pan basies i fy nhest nes i gael leisens, ffeindio bws a bant â ni. Erbyn heddi mae eisie CRB, CPC ac mae dipyn o waith papur i’w wneud.”

Yn y 1960au roedd prawf trwydded bysus yn dra gwahanol i heddiw.

“Rownd yr Efail Wen fuodd hi bryd hynny – rownd y sgwâr a throi rownd ac ateb cwpl o gwestiyne. Wedodd e wrtha i fod rhaid fi fynd dim pellach, odd e’n gwybod mod i’n gallu handlo fe’n iawn a 'na i gyd am biti ‘ni.

“Faint gwell dreifars sydd heddi wedi mynd drwy’r tests i gyd so i’n gwybod.”

A oedd yna barti i ddathlu wrth i Keith ymddeol?

“Dim parti, ond aethon ni lan i Lanfyllin ar y penwythnos gan fod fy wyres wedi cael babi bach o’r enw Gruff. Mae naw o wyrion 'da fi, a’r babi yma odd fy nawfed gor-ŵyr i.

"‘Nathon ni ei weld e, ac yna lan i Fangor a chael noson fan yna cyn dod 'nôl."

Does gan Keith ddim cynlluniau i arafu hyd yma: “Dwi’n teimlo bo' fi dal yn mynd biti’r lle dal i fod."

Bydd y gymuned yn siŵr o'i gweld hi'n od heb Keith ar y lonydd, awgrymodd Shân Cothi.

“Sai’n gwybod am hynny, fydden nhw’n falch o’n wared i falle!” atebodd Keith.

Ond er ei sylwadau diymhongar, mae ardal y gorllewin yn debygol o deimlo colled enfawr yn dilyn penderfyniad Keith i adael sedd flaen y bws.