����ý

Mae prif hyfforddwr Cymru Warren Gatland yn dweud ei fod am ystyried ei ddyfodol ar ôl cyfarfod â phenaethiaid Undeb Rygbi Cymru (URC) yn ystafell newid Stadiwm Principality wedi'r golled yn erbyn Awstralia.

Dywedodd Gatland, 61, y bydd yn cytuno â "beth bynnag yw'r penderfyniad gorau i rygbi Cymru" yn dilyn cwestiynau dros ei swydd.

Mae Cymru wedi colli 11 gêm brawf o'r bron am y tro cyntaf erioed yn dilyn y golled o 20-52 yn erbyn Awstralia ddydd Sul.

Dywedodd Gatland iddo siarad â chadeirydd URC Richard Collier-Keywood a'r cyfarwyddwr gweithredol rygbi Nigel Walker ar ôl y gêm.

"Beth bynnag yw'r penderfyniad gorau i rygbi Cymru, dwi'n fwy na chyfforddus gyda hynny," meddai.

"Os ydy hynny amdana i'n gadael a dyna'r penderfyniad gorau, yna gwnewch y penderfyniad.

"Fe wnawn ni siarad am hynny a gwneud hynny gyda'n gilydd."

Nid yw Cymru wedi ennill gêm brawf ers dros 13 mis ac mae'r tîm wedi llithro i'r 11eg safle yn netholion y byd.

"Mae 'na gymaint o negyddiaeth o gwmpas y gêm o ran yr hyn sydd wedi bod yn digwydd ar y cae ac oddi arno," meddai Gatland.

“Yr hyn dwi’n poeni amdano’n aruthrol yw rygbi Cymru a dyfodol y gêm.”

Gofynnodd Gatland a fyddai newid nawr yn cael effaith ar ffawd rygbi Cymru.

"Os ydych chi'n mynd i fy newid i, pwy ydych chi'n mynd i ddod i mewn a sut maen nhw'n mynd i newid pethau?" gofynnodd.

“Efallai y bydd gwneud newid yn helpu i liniaru rhywfaint o’r negyddiaeth oherwydd bydd yn newid pethau a bydd y ffocws ar rywbeth arall.

"Ond a fydd hynny'n gwella'r gêm? Ydych chi'n mynd i ddod o hyd i'r person iawn i wneud rhywbeth arall?

"Neu ydyn ni'n well ein byd yn rhoi ein pen i lawr, bwrw ymlaen a gobeithio - rhoi rhai pethau yn eu lle a all, gobeithio, wneud rhai gwelliannau ar lefel ranbarthol ac yn y system, a all fod o fudd i ni."

Roedd Gatland wedi derbyn llawer o feirniadaeth cyn gêm Awstralia gan gyn-chwaraewyr.

Dywedodd ei fod wedi gofyn i'w hun a oedd angen y drafferth, ac y byddai'n siarad am ei sefyllfa gyda'i deulu, ond mynnodd fod ganddo'r uchelgais i barhau.

"Mae'n heriol ar hyn o bryd, y mwyaf heriol mae wedi bod," cyfaddefodd Gatland.

“Rwyf wedi bod yn ôl ers dwy flynedd, byddwn yn dweud bod un o’r blynyddoedd, gyda’r hyn a wnaethon ni gyflawni yng Nghwpan y Byd, yn weddol lwyddiannus,” meddai.

“Roedd yna lawer o bobl yn dweud na fydden ni’n dod allan o’n grŵp yng Nghwpan y Byd achos doedden ni ddim yn ddigon da.

"Fe wnaethon ni ennill y grŵp yn y diwedd a dylen ni fod wedi cyrraedd rownd gynderfynol. Roedden ni'n siomedig.

"Nid yw'r 12 mis diwethaf wedi bod yn llwyddiannus. Rydym wedi colli llawer o brofiad ac rydym yn gwybod bod cyfnod ailadeiladu i fynd drwyddo."

'Pwy chi'n mynd i ddod mewn?'

Yn siarad ar raglen Dros Frecwast fore Llun dywedodd cyn-chwaraewr Cymru Emyr Lewis bod cyfuniad o ffactorau wedi arwain at drafferthion y tîm.

Dywedodd fod ymddeoliad chwaraewyr profiadol dros y blynyddoedd diwethaf wedi chwarae rhan, a bod yr "oes aur" o chwaraewyr dros y degawd diwethaf wedi cuddio'r ffaith nad oes digon o chwaraewyr ifanc wedi datblygu'n sêr rhyngwladol.

Ychwanegodd fod gormod o chwaraewyr ifanc Cymru yn mynd i academïau yn Lloegr, "a ma’ nhw tu allan i radar Cymru wedyn a ni’n colli nhw i’r Saeson".

Dywedodd nad oes pwrpas galw ar Gatland i adael heb i gynllun gwell fod mewn lle.

"Does dim pwrpas i ni jyst dweud, ma’ rhaid i Warren Gatland fynd," meddai.

"Y cwestiwn nesaf yw - pwy chi'n mynd i ddod mewn? Faint o effaith ma' fe'n mynd i gael?

"A beth sydd mynd i ddigwydd o fan’na 'mlaen, achos mae'n rhaid i ni edrych hwn pump, 10, 15 mlynedd i’r dyfodol."

Mae pencampwyr y byd De Affrica yn dod i Gaerdydd ddydd Sadwrn nesaf.

Mynnodd Gatland y bydd carfan Cymru yn benderfynol o drawsnewid pethau’r penwythnos nesaf.

"Pan ydych chi'n ymwneud â chwaraeon proffesiynol, dyna'r heriau sy'n eich diffinio chi fel unigolyn," meddai Gatland.

Rhoddodd Gatland neges angerddol i gefnogwyr Cymru yn dilyn y golled yn erbyn Awstralia.

"Rydyn ni'n brifo'n fawr heddiw," meddai.

“Mae’r cefnogwyr wedi bod yn wych gyda’r gefnogaeth maen nhw wedi ei rhoi i ni dros y blynyddoedd.

"Mae'n debyg ein bod yn eu siomi ychydig. Felly mae angen i ni fynd allan yr wythnos nesaf a chywiro hynny trwy roi perfformiad y gallant fod yn falch ohono."