´óÏó´«Ã½

Mae un o sêr y gyfres deledu The Diplomat wedi dweud ei bod eisiau dysgu Cymraeg er mwyn gallu defnyddio'r iaith i gyfathrebu â'i mab.

Mae Keri Russell mewn perthynas â'r Cymro Matthew Rhys, ar ôl iddyn nhw gwrdd ar set y ddrama The Americans.

Dywedodd Ms Russell ei bod wedi dysgu ambell ymadrodd o glywed ei phartner yn siarad â'u mab.

Wrth siarad â'r ´óÏó´«Ã½, dywedodd yr actores ei bod yn "gyfarwydd â bore da, nos da, dwi'n gwybod sut i gyfri. Ond mae Math yn siarad Cymraeg â Sam fwy neu lai drwy'r amser."

Aeth ymlaen i ddweud ei bod yn ysu i ymweld â chanolfan Nant Gwrtheyrn yng Ngwynedd, ar ôl mynegi cymaint o ddiddordeb yn niwylliant Cymru.

"Mae popeth ynghylch y diwylliant Cymraeg a'r Eisteddfod, mae popeth yn gysylltiedig â cherddi a dawns a chelf yn gyffredinol," meddai.

"Roedd cwrdd â Math a dysgu am hynny, mae'n gymaint o ran o bwy ydyw, a pha mor cŵl yw gweld plant yn cael eu magu yn perfformio yn yr hen draddodiad o gelf a chanu a dawnsio."

Fe wnaeth ail gyfres The Diplomat gael ei rhyddhau ar Netflix yr wythnos hon.

Mae Ms Russell yn chwarae rhan Llysgennad UDA yn y gyfres deledu.

Gyda'r etholiad arlywyddol yn ei anterth yn America, mae'n mynnu mai damweiniol yn unig y unrhyw debygrwydd rhwng y gyfres a gwleidyddiaeth y wlad heddiw.

Dywedodd i'r ysgrifennu a'r ffilmio ddigwydd "amser maith yn ôl" ond bod streic actorion ac awduron wedi tarfu ar y ffilmio.

Dywedodd ei bod yn ddiolchgar o'r cyfle i bortreadu gwraig bwerus a galluog yn y gyfres.