����ý

Mae Heddlu'r De yn chwilio am chwe dyn ar ôl i ddau ohonyn nhw redeg i fwyty yng Nghaerdydd a thaflu hylif dros y pedwar arall ac roedd ofnau ei fod yn sylwedd cyrydol.

Cafodd dodrefn hefyd eu taflu gan y dynion yn y bwyty yn y Bae ac yna fe wnaeth y chwech ffoi oddi yno.

Mae plismyn yn credu bod y digwyddiad nos Fercher yn "un a oedd wedi'i dargedu" wedi ffrae a ddigwyddodd yn gynharach rhwng y chwech.

Cafodd y gwasanaethau brys eu galw i ardal Cei'r Fôr-forwyn a bu'n rhaid i'r bwyty gau.

“Roedd pedwar dyn yn eistedd yn y bwyty pan redodd dau ddyn arall i mewn i’r bwyty a thaflu sylwedd atyn nhw,” meddai’r Ditectif Arolygydd Phil Marchant.

“Cafodd dodrefn hefyd eu codi a’u taflu.

“Yna rhedodd y pedwar dioddefwr a’r ddau ddyn arall allan o’r bwyty."

Ychwanegodd nad oes unrhyw adroddiadau o anafiadau ac "ar hyn o bryd ni chredir bod yr hylif yn un niweidiol".

Dywedodd ei bod hi'n debygol bod y ddau grŵp "wedi cael ffrae yn gynt mewn rhan arall o'r cei am tua 18:15... ac felly bod yr heddlu yn credu bod hwn yn ymosodiad wedi'i dargedu".

Mae'r heddlu'n ceisio dod o hyd i bob un o'r dynion.

Maen nhw hefyd eisiau siarad ag unrhyw un oedd ym mwyty Las Iguanas, neu ger safle'r bwyty ar Sgwâr Tacoma rhwng 18:15 a 20:30 nos Fercher, neu sydd ag unrhyw wybodaeth.

Roedd bwyty Las Iguanas yn parhau ar gau fore Iau.

Dywedodd llefarydd ar ran Cei'r Fôr-forwyn fod y gwasanaethau brys yn cynnal ymchwiliadau.

“Mae’r digwyddiad hwn bellach ar ben ac yn cael ei ymchwilio. Oherwydd hyn ni allwn wneud sylw pellach,” ychwanegodd.