´óÏó´«Ã½

Thuirt prìomh-choidse sgioba ball-coise nam ban aig Alba, Pedro Martinez Losa, gu bheil e airson luchd-taice na sgioba nàiseanta a bhith "moiteil" às an dùthaich aca agus gu bheil aig an sgioba ri ball-coise tarraingeach a chluich airson sin a dhèanamh.

Tillidh Caroline Weir agus Lisa Evans dhan sguad às dèidh dhaibh call a-mach air àite san sgioba air an t-sreath gheamaichean nàiseanta mu dheireadh leis gun robh iad air an goirteachadh.

Choisinn sgioba na h-Alba 6 puingean an aghaidh na h-Ungaire agus nan Eileanan Fàrach ann an cuairtean dearbhaidh Cupa na Cruinne 2023 air a' mhìos seo chaidh - gam fàgail anns an dàrna àite sa bhuidhinn dearbhaidh aca, co-ionnan leis an Spàinn.

Às dèidh do Mhartinez Losa triùir chluicheadairean fhàgail a-mach às an sguad a bha an sàs anns na geamaichean mu dheireadh, thuirt e gu bheil e ag amas air an taghadh chluicheadairean aige a dhèanamh nas fharsainge.

"Feumaidh an sgioba nàiseanta a bhith fosgailte do chluicheadair sam bith a tha comasach air cluich dhuinn ge b' e an aois no ciamar a tha cùisean a' dol aig na clubaichean aca".

Cluichidh Alba an aghaidh na h-Ungaire aig Pàirce Hampden air an 22 là den mhìos, agus cuiridh iad fàilte air an t-Suain ceithir làithean às dèidh sin ann an geama càirdeil.